Ռուսաստանի և Արևմուտքի միջև շարունակվում են «սառը պատերազմի» ժամանակաշրջանում ծնված կասկածները, իսկ ԱՄՆ-ը և Բրիտանիան փորձում են վերացնել դրանք, որպեսզի կողմերն օբյեկտիվորեն գնահատեն համաշխարհային արենայում իրենց համագործակցությունը, այդ թվում՝ նաև Սիրիայի հարցում: Այսպիսի հայտարարություն է արել ԱՄՆ նախագահ Բարաք Օբաման՝ ելույթ ունենալով Վաշինգտոնում Բրիտանիայի վարչապետ Դևիդ Քեմերոնի հետ բանակցությունների ավարտին հրավիրված համատեղ մամլո ասուլիսում։
Ամերիկյան առաջնորդի խոսքերով՝ «համաշխարհային հանրությունը շահագրգռված է, որ Սիրիայում ավարտվի քաղաքացիական պատերազմը»:
Օբաման նշել է, որ շատ ուրախ է, որ Քեմերոնն ու Պուտինն անցած շաբաթ Սոչիում կառուցողական հանդիպում են ունեցել: Նա ասել է, որ այդ հանդիպումը կայացել է այն բանից հետո, երբ Մոսկվա է այցելել ԱՄՆ պետքարտուղար Ջոն Քերին, ում ընդունել է Ռուսաստանի առաջնորդը: Օբաման հիշեցրել է, որ իր և Պուտինի միջև անցած շաբաթ մի շարք հեռախոսային զրույցներ են տեղի ունեցել, որոնցում քննարկվել է նաև Սիրիայի իրավիճակը:
Նա ավելացրել է, որ ոչ ոքի համար գաղտնիք չէ, որ Ռուսաստանի և Արևմուտքի միջև «սառը պատերազմի» ժամանակաշրջանում ծնված կասկածների առկայությունը: Այդ կապակցությամբ նա հավաստիացրել է, որ իր, ԱՄՆ կառավարության և Բրիտանիայի իշխանությունների առջև դրված նպատակներից մեկն այդ կասկածները հաղթահարմանը նպաստելն է:
«Եթե մենք կարողանանք (Սիրիայում) իշխանության խաղաղ փոխանցման գործում միջնորդի դեր խաղալ, որը կհանգեցնի Ասադի ռեժիմի հեռացմանը, սակայն Սիրիայի պետական ինստիտուտների պահպանմանը, որոնք երկրում հաշվի կառնեն բոլոր էթնիկ և կրոնական խմբերի շահերը, վերջ կդնեն արյունահեղությանը, կկայունացնեն իրավիճակը, ապա դա լավ կլինի ոչ միայն մեր, այլև բոլորի համար»,- նշել է Օբաման: Նա խոստացել է, որ ԱՄՆ-ը կպայքարի հարցի այդպիսի կարգավորման համար, սակայն չի խոստացել, որ այն հաջողությամբ կպսակվի:
Իր կողմից Քեմերոնն ավելացրել է, որ «անցած ուրբաթ Սոչիում նախագահ Պուտինի հետ շատ կառուցողական հանդիպում են ունեցել»: Բրիտանիայի վարչապետը նշել է, որ Ռուսաստանը, ԱՄՆ-ը և Բրիտանիան շահագրգռված են, որ Սիրիայում կայուն ժողովրդավարություն ապահովվի և երկրում ծայրահեղականությանն ու բռնությանը վերջ դրվի:
