«Եվրատեսիլ-2013» միջազգային երգի մրցույթի պաշտոնական բացումը տեղի կունենա Շվեդիայի Մալմյո քաղաքում: Բացման հանդիսավոր արարողությունը տեղի կունենա քաղաքային օպերայի շենքում՝ այսօր երեկոյան: Այս մասին հաղորդում է ITAR-TASS-ը:
Այս՝ 58-րդ «Եվրատեսիլին» մասնակցում է 39 երկիր: Երկու կիսաեզրափակիչները տեղի կունենան մայիսի 14-ին և 16-ին, իսկ եզրափակիչը՝ 18-ին: Այս շոուները կհեռարձակվեն ուղիղ եթերով: Մրցույթը տեղի կունենա «Մալմյո արենա» համալիրում, որում տեղավորվում է 15.5 հազար հանդիսատես:
«Եվրատեսիլ»-ի կազմակերպիչներն են Եվրոպական հեռարձակողների միությունը (ԵՀՄ) և հյուրընկալող երկրի գլխավոր հեռուստաընկերությունը՝ շվեդական SVT-ն (Sveriges Television): Շվեդիան արդեն 4 անգամ անցկացրել է այս մրցույթը՝ 1975թ.-ին, 1985թ.-ին, 1992թ.-ին և 2000թ.-ին:
Մրցույթը համարվում է «հեռուստադիտողների մեջ ամենահայտնի ոչ մարզական իրադարձությունը»: Մրցույթի լսարանը գերազանցում է 100 մլն-ը:
