Երբ Երևանի, այսպես ասած, նորընտիր քաղաքապետ Տարոն Մարգարյանին լրագրողները հարցրել են, թե ինչ է մտածում իր ունեցվածքին առնչվող ՀՔԾ-ում հայտնված գործի վերաբերյալ, Մարգարյանը մի բավականին խորհրդանշական պատասխան է տվել՝ «էտի ո՞րն ա»: Տարոն Մարգարյանը չգիտե, թե ՀՔԾ-ն որն է: Մարգարյանը երևի ավելի լավ գիտե, թե ինչ է ԽԾԲ-ն՝ խնամի, ծանոթ, բարեկամ: Չէ՞ որ նա հենց այդ տրամաբանության շրջանակում է բավականին երիտասարդ տարիքում դարձել Ավանի թաղապետ: Եթե նրա հայրը չլիներ վարչապետ, Տարոն Մարգարյանը թաղապետ չէր դառնա:
Նույն սկզբունքով Մարգարյանը ներկայումս նշանակում է Երևանի վարչական շրջանների ղեկավարներին և այլ պաշտոնների, որոնք նրա իրավասության տիրույթում են, ընկերների, բարեկամների, ծանոթների: Իսկ բարեկամներից մեկին էլ՝ աներձագին, Տարոն Մարգարյանը, ինչպես հայտնի է, օգնեց պատգամավոր դառնալ: Այսինքն՝ ԽԾԲ-ն նա լավ գիտե, իսկ ահա ՀՔԾ-ն՝ «էտի ո՞րն ա»: Լրագրողները, բնականաբար, ասում են, որ դա Հատուկ քննչական ծառայությունն է: Բայց Տարոն Մարգարյանի անգիտությունը այս հապավման հարցում մնում է խորհրդանշական:
Բանն այն է, որ Հատուկ քննչական ծառայության ուշադրության կենտրոնում հայտնվելը պետք է մտահոգիչ լինի ցանկացած պաշտոնյայի համար ինքնին, անկախ նրանից՝ նա հանցանք գործել է, թե ոչ: Պաշտոնյան պետք է գոնե հետաքրքրվի, թե ինչու է հայտնվել ՀՔԾ ուշադրության կենտրոնում: Հետաքրքրվելու դեպքում, նա առնվազն կիմանա, թե ինչ է ՀՔԾ-ն՝ ինչ հապավում է այն: Փաստորեն, Տարոն Մարգարյանը բացարձակապես չի հետաքրքրվել իր ունեցվածքի վերաբերյալ գործի ՀՔԾ-ում հայտնվելով:
Սա մի բան է նշանակում, որ Մարգարյանը համոզված է, որ ինչ էլ լինի, ինքը պատասխանատվության չի ենթարկվելու՝ ոչ իրավական և ոչ էլ բարոյական: Այլապես նա կհետաքրքրվեր, թե ինչու իր անունը հասել ՀՔԾ: Այսինքն՝ այս անտարբեր վերաբերմունքը վկայում է ավելի խոշոր երևույթի մասին՝ իշխանական համակարգում Հատուկ քննչական ծառայության հանդեպ անլուրջ վերաբերմունքի: Այլապես, իր բնույթով այս կառույցն այնպիսին է, որ պաշտոնյաները պետք է ամեն ինչ անեին հանկարծ այդ կառույցի ուշադրության կենտրոնում չհայտնվելու համար, իսկ հայտնվելու դեպքում էլ անմիջապես հետաքրքրվեին, թե ինչու, ինչպես, ինչի համար:
«Էտի ո՞րն ա»-ն շատ խորհրդանշական հնչեց հատկապես ՀՔԾ-ում Սերժ Սարգսյանի անցկացրած խորհրդակցության և այս կառույցի պետի փոփոխության ֆոնին, ինչպես նաև նախկին պետից դժգոհության և այլևս որևէ ընկեր, ծանոթ, բարեկամ, այսինքն՝ ԽԾԲ հաշվի չառնելու հորդորի ու հանձնարարության ֆոնին: Այսինքն՝ Սերժ Սարգսյանն էլ, առնվազն հայտարարությունների մակարդակում գիտակցում է, որ պաշտոնյաները ԽԾԲ-ն լավ իմանալու փոխարեն, պետք է ՀՔԾ-ն լավ իմանան, թե որն է:
Սակայն արդյո՞ք իրականում այս ամենը թատրոն չէ կամ քարոզչություն, և իշխանական համակարգը շարունակելու է ԽԾԲ-ն ընկալել ՀՔԾ-ի տեղ: Այս հարցի պատասխանը կտրվի հատուկ քննչական ծառայության գործունեության ընթացքում առաջիկա շաբաթներին և ամիսներին: Տարիները արդեն չափից դուրս կլինեն և չափից շատ: Եվ հարցի լավագույն պատասխաններից մեկը կլինի Տարոն Մարգարյան միլիոնատիրոջ հանդեպ ՀՔԾ-ի դիրքորոշումը, և եթե Տարոն Մարգարյանը արդեն լավ իմանա, թե ՀՔԾ-ն որն է, ուրեմն ինչ-որ բան իրական է, այլապես ամեն ինչ կմնա նույն շրջանակում և իշխանական քեֆերում կարող են երգել՝ ՀՔԾ-դ ԽԾԲ-իս վնաս չէ, վնաս չէ:
Լուսանկարը` PanARMENIAN Photo-ի
