Անցած տարի Toyota Corolla-ն նորից եղել է ամենաշատ վաճառված մոդելն աշխարհում՝ վաճառքի բացարձակ ռեկորդ սահմանելով: Այս մասին հայտնում է autostat.ru-ն՝ հղում անելով focus2move նախագծի տվյալներին:
2015 թ. Toyota Corolla-ի համաշխարհային վաճառքը կազմել է 1,339 մլն օրինակ, ինչը 4,7%-ով գերազանցում է նախորդ տարվա ցուցանիշը: Մոդելն առավել մեծ պահանջարկ ունի ԱՄՆ-ում (363 300), Չինաստանում (300 600), Ճապոնիայում (109 000):
Գլոբալ վաճառքի ծավալով երկրորդ տեղում Volkswagen Golf-ն է, որի վաճառքը 2015 թ. առաջին անգամ գերազանցել է 1 մլնը և կազմել է 1,041 մլն հատ (+8,4%):
Ford F-Series փիքափն ամենասիրված մոդելն է Ամերիկայում վերջին 40 տարում: Նախորդ տարվա համաշխարհային ցուցակում այն զբաղեցրել է 3-րդ տեղը 920,17 հազար մեքենա արդյունքով (+1,6%), որից 780 000-ն իրացվել է ԱՄՆ-ում, 118,8 հազարը՝ Կանադայում:
Աշխարհի ամենաշատ վաճառված մոդելների տասնյակում են նաև Ford Focus-ը (826,2 հազար՝ -19,4%), Toyota Camry-ն (754,2 հազար՝ -1,9%), Hyundai Elantra-ն (746,9 հազար՝ -9,1%), Volkswagen Polo-ն (698,2 հազար՝ +2,2%), Honda CR-V-ն (696,6 հազար՝ -2,5%), Chevrolet Silverado-ն (669,7 հազար՝ +12,9%), Toyota RAV4-ը (664,4 հազար՝ +5,5%):
