Վրաստանի վարչապետ Բիձինա Իվանիշվիլին, Ադրբեջանի պետական SOCAR նավթային ընկերության նախագահ Ռովնագ Աբդուլաևը և Ադրբեջանի մշակույթի և զբոսաշրջության նախարար Աբուլֆաս Գարաևն այսօր Ռուսթավիում բացել են Ադրբեջանի նախկին առաջնորդ Հեյդար Ալիևի հուշարձանը:
Այդ կապակցությամբ ելույթ ունենալով՝ Իվանիշվիլին խոսել է երկու երկրների միջև առկա հարաբերությունների մասին՝ մատնանշելով Հեյդար Ալիևի առանձնակի դերակատարությունը Բաքու-Թբիլիսի-Ջեյհան նավթատարի շինարարության գործում:
Նա նշել է, որ անհրաժեշտ է անել ամեն բան, որպեսզի Վրաստանի և Ադրբեջանի պատմական բարեկամությունն ավելի բարձր մակարդակի հասնի:
«Մենք հպարտությամբ կարող ենք ասել, որ Ադրբեջանը մեր ռազմավարական գործընկերն է և անհրաժեշտ է անել ամեն բան, որպեսզի համատեղ ջանքերով կարողանանք հասնել մեր երկրների բարգավաճմանը: Մենք հպարտանում ենք մեր պատմական բարեկամությամբ և այսօրվա օրով»,- ասել է Իվանիշվիլին, ում խոսքերը մեջբերում է «Գրիուզիա Օնլայն»-ը:
