Գյուղական տարածքների տնտեսական զարգացման ԾԻԳ-ը սկսում է գյուղատնտեսության աջակցման նոր ծրագիր՝ հիմնականում միջազգային կառույցների ֆինանսավորմամբ: Ծրագրի ընդհանուր գումարը 56 մլն ԱՄՆ դոլար է, որն օգտագործվելու է տարբեր ուղղություններով: Դրանից 3.7 մլն-ը վարկերի տեսքով տրվելու է գյուղացիներին՝ այգեգործության զարգացման համար:
Հայտնի է, որ Հայաստանում գյուղացիներն առանց այն էլ վարկային լուրջ խնդիրներ ունեն, գյուղեր կան, որ, կարելի է ասել, «գերի» են վարկային կազմակերպությունների ձեռքում:
Գյուղական տարածքների տնտեսական զարգացման ԾԻԳ-ի տնօրեն Աշոտ Վարդանյանից հետաքրքրվեցինք՝ ի՞նչ պայմաններով են գումարները տրվելու գյուղացիներին, և ի՞նչ երաշխիք կա, որ դրանք կվերադարձվեն: Աշոտ Վարդանյանն ասաց, որ կառավարությունը որոշել է սուբսիդավորել սահմանային տարածքների վարկերի տոկոսների կեսը:
«Ներկա պահին մենք դանիական կառավարությունից վերցրել ենք վարկ, որը մեր պետությանը տրվել է 2 տոկոսով: Մենք բանկերով մրցույթ ենք հայտարարելու: Վարկն ուղղված է այգեգործության հիմնմանը: Հույս ունենք, որ դա պետք է գյուղացուն հասնի մինչև 7 տոկոս դրամով վարկի տեսքով»,- ասաց Վարդանյանը՝ հավելելով, որ վարկը տրվելու է 7 տարի ժամկետով:
Մեր դիտարկմանը՝ 7 տոկոսն էլ ցածր տոկոսադրույք չէ գյուղացու համար, Վարդանյանն ասաց. «Մենք բանկ չենք, բանկային գործունեություն չենք իրականացնում»:
Մանրամասները՝ տեսանյութում:
