Մայիսի 26-ին Արմավիրի մարզի Վարդանաշեն համայնքում տեղի են ունենալու գյուղապետի ընտրություններ: «Ժողովուրդ»-ը տեղեկացել է, որ այս պահի դրությամբ գրանցվել է գյուղապետի ընդամենը երկու թեկնածու. գործող գյուղապետ ՀՀԿ-ական Արթուր Մանուկյանն ու ՕԵԿ-ական Աշոտ Հայրապետյանը: Ի դեպ, վերջինը գործող Գյուղապետի՝ Ա. Մանուկյանի սանիկն է:
Թերթը Մանուկյանից հետաքրքրվել է՝ արդյոք լարված չէ գյուղում տիրող
նախընտրական վիճակը. «Չէ, լարվածություն չկա: Մեզ մոտ խաղաղություն է: Ոչ ոքի հանդեպ թշնամացած չեմ: Ես չգիտեմ, թե Հայրապետյանը ոնց է համոզում գյուղացիներին, բայց ես ոչ ոքի չեմ համոզում: Աշխատել եմ չորս տարի, ու այս ընթացքում ժողովուրդը, իմանալով իմ լավ ու վատ կողմերը, կամ ձայն կտա, կամ էլ ոչ: Նրա բարեկամությունն ու ընկերությունը տրամադրված են, որ իրեն ձայն տան, հո չե՞ս կարող միանշանակ բոլորին թեքել իմ կողմ»:
Մանուկյանի տեղեկացմամբ՝ իր դեմ առաջադրվել է հարազատ սանիկը. «Իմ սանիկն է, ուզում է գյուղապետ դառնալ: Ես համ նրա կնունքի, համ հարսանիքի քավորն եմ»: Գյուղի ընտրացուցակում գրանցված են 790 ընտրող, սակայն ընդամենը 530-ն են մասնակցելու համայնքի ղեկավարի ընտրություններին: Մնացածներն այս պահին գտնվում են Ռուսաստանի Դաշնությունում՝ արտագնա աշխատանքի նպատակով:
