Առանց համացանցին հասանելիության աշխարհում ապրում է մոտ 4 մլրդ մարդ՝ ասվում է Համաշխարհային բանկի «Թվային շահութաբաժիններ» (դիվիդենդ) զեկույցում։ Փաստաթղթում ընդգծվում է, որ չնայած համացանցի օգտատերերի թիվը եռապատկվել է վերջին տասնամյակում և հասել 3.2 միլիարդի, աշխարհի բնակչության մոտ 60 տոկոսը մինչ օրս հասանելիություն չունի համացանցին։
Զեկույցի հեղինակները նախազգուշացնում են, որ նրանք, ովքեր հասանելիություն չունեն թվային տեխնոլոգիաներին, կրթությանն ու ադապտացման հմտություններին, ավելի շատ հետ կմնան առաջ շարժվող մնացյալ աշխարհից։
«Գլխավոր խնդիրն այն է, որպեսզի համացանցին միացվեն բոլորը»,- ասել է հեղինակներից մեկը՝ Ուվե Դայհմանը։ Այս մասին հայտնում է Interfax-ը։
Թվային տեխնոլոգիաները զգալիորեն զարգացել են վերջին երկու տասնամյակում և մեծ իրարանցում առաջացրել հնարավորությունների առնչությամբ, որոնք բացում է թվային տեխնոլոգիաների դարաշրջանը։ Սակայն զեկույցի հեղինակների խոսքով՝ երկար սպասված օգուտի՝ արտադրողականության բարձրացման, աղքատների ու միջին դասի համար հնարավորությունների ընդլայնման, իշխանության մարմինների ու ընկերությունների հաշվետվողականության տարածումն այնքան լայն չեղավ, որքան սպասվում էր։
«Մենք կարծում ենք, որ թվային ներդրումները դիվիդենդների վերածելը շատ ավելի դժվար է, քան այդ մասին ասել են շատ փորձագետներ»,- նշում են զեկույցի հեղինակները։
