«Բարև Երևան» դաշինքի համամասնական ցուցակի վեցերորդ հորիզոնականը զբաղեցնող, ԺՈՒԿ քաղխորհրդի անդամ Արթուր Գասպարյանը «Առաջին լրատվական»-ի հետ զրույցում ասաց, որ մանդատներից հրաժարվելու որոշումը քննարկվելու է դաշինքի հրավիրած նիստի ընթացքում. «Այդ հարցը դեռ չի քննարկվել, մենք շտաբի նիստ չենք արել և ընտրակեղծիքների վերջնական մասշտաբը առայժմ չենք գնահատել, այնպես որ՝ այդ հարցի մասին խոսելը վաղաժամ եմ համարում»:
Արթուր Գասպարյանը նաև նշեց, որ դա անձամբ իր որոշումը չէ՝ եթե դաշինքը գտնի, որ ճիշտ է մանդատներից հրաժարվելը, ապա նա կընդունի այդ որոշումը:
Անդրադառնալով երեկ անցկացված Երևանի ավագանու ընտրություններին՝ Ա. Գասպարյանը կարծիք հայտնեց, որ ընտրախախտումները այս անգամ կատարվում էին ընտրատեղամասերից դուրս. «Ընտրությունները անցան համատարած ընտրակաշառքի ներքո: Կոնկրետ տեղամասերում հսկողությունը մեծ էր, արդար ընտրություններ անցկացնելու շահագրգիռ կողմերը շատ էին՝ «Բարև Երևան»-ը, Դաշնակցությունը, ՀԱԿ-ը, մասամբ էլ «Բարգավաճը»: Դրա համար իշխող կուսակցությանը չհաջողվեց ընտրատեղամասերում մեծ խախտումներ անել, սակայն տեղամասերից դուրս համատարած ընտրակաշառք բաժանվեց»:
Ա. Գասպարյանի գնահատմամբ՝ ընտրություններն անցել են վարչական ռեսուրսի ճնշման ներքո, և ոստիկանությունը նույնիսկ իրենց ահազանգերից հետո չի միջամտել ընտրակաշառքների բաժանմանը. «Այսինքն՝ զանգում էին Հանրապետականի շտաբ, ասում էին՝ այսինչ տեղում այսինչ մեքենան ընտրակաշառք է բաժանում, և հետո մինչև գալիս էին, այդ մեքենան այլևս տեղում չէր լինում»:
Դիտարկմանը՝ ընտրակաշառքի պատճառով միայն ընդդիմությա՞նը չհաջողվեց հաղթանակ գրանցել, Գասպարյանը պատասխանեց. «Պաշտոնական տվյալներով՝ 35 տոկոս աղքատության դեպքում ոչինչ չի մնում, քան վերցնել ընտրակաշառքն ու բարոյական ճնշումների ներքո ձայն տալ իշխող վարչախմբին»:
Մեր զրուցակցից հետաքրքրվեցինք նաև, թե մանդատները վերցնելու դեպքում կհամագործակցե՞ն «Բարգավաճ Հայաստան»-ի հետ, վերջինս պատասխանեց. «Եթե մենք մանդատները վերցնենք, ես չգիտեմ՝ «Բարգավաճ»-ի հետ կհամագործակցենք թե չէ, սակայն իշխող վարչախումբն այդուհետ օր ու արև չի ունենա: Նա այդպես հանգիստ չի քնելու և այդպես հանգիստ որոշումներ չի կայացնելու: Ամեն ինչը լինելու է մեր վերահսկողության ներքո: Ամեն ինչի մասին բարձրաձայնվելու է, և ինֆորմացիան տրվելու է մամուլին»:
Լուսանկարը՝ PanARMENIAN Photo-ի
