Մայիսի 7-ին Սահմանադրական դատարանը գրավոր ընթացակարգով քննության կառնի «Ծիծեռնակ-8» ՍՊԸ դիմումի հիման վրա գործը: Դիմումատուն վիճարկում է ՀՀ վարչական դատավարության օրենսգրքի 118.7-րդ հոդվածի 2-րդ մասի, ՀՀ դատական օրենսգրքի 91-րդ հոդվածի, «Պետական ոչ առևտրային կազմակերպությունների մասին» օրենքի 4-րդ և 5-րդ հոդվածների, ՀՀ հողային օրենսգրքի 75-րդ հոդվածի սահմանադրականությունը:
ՀՀ վարչական դատավարության օրենսգրքի 118.7-րդ հոդվածի` վճռաբեկ բողոքը վերադարձնելը, 2-րդ մասի համաձայն` վճռաբեկ բողոքը վերադարձնելու մասին վճռաբեկ դատարանը կայացնում է որոշում` գործը վճռաբեկ դատարանում ստանալու պահից մեկ ամսվա ընթացքում։ Վճռաբեկ բողոքը վերադարձնելու մասին որոշումը պետք է լինի պատճառաբանված։
ՀՀ դատական օրենսգրքի վիճարկվող 91-րդ հոդվածը սահմանում է դատավորի ինքնաբացարկի հիմքերը:
ՀՀ հողային օրենսգրքի 75-րդ հոդվածը ամրագրում է պետության և համայնքների սեփականությանը պատկանող հողերի անհատույց (մշտական) օգտագործման տրամադրման կարգը:
«Պետական ոչ առևտրային կազմակերպությունների մասին» օրենքի 4-րդ և 5-րդ հոդվածները համապատասխանաբար վերաբերում են պետական կազմակերպության սեփականությանը և պետական կազմակերպությանն ամրացված գույքին:
Գործով զեկուցողը ՍԴ անդամ Կիմ Բալայանն է, որպես պատասխանող կողմ դատաքննությանը ներգրավված է վիճարկվող օրենսդրությունն ընդունած Ազգային ժողովը:
Այս գործի դատաքննությունը նախապես նշանակված էր մարտի 19-ին, սակայն ՍԴ-ն, գործով լրացուցիչ նյութերի համակողմանի ուսումնասիրման անհրաժեշտությունից ելնելով, որոշեց այն հետաձգել՝ լրացուցիչ նյութեր պահանջելով Երևանի քաղաքապետարանից և ՀՀ դատական դեպարտամենտից: Խոսքը, մասնավորապես, ՍԴ-ում քննվող գործի առնչությամբ քաղաքապետի 2000թ.-ի հոկտեմբերի 4-ի որոշման և Նորք-Մարաշ համայնքների առաջին ատյանի դատարանի 2001թ.-ի սեպտեմբերի 12-ի վճռի մասին է:
