Բուլղարիան ցանկանում է Հարավարևելյան և Կենտրոնական Եվրոպայի համար դառնալ գազի գլխավոր տարանցող՝ շնորհիվ «Բալկան» գազապահեստարանի նախագծի։ Այն ծրագրվում է կառուցել սևծովյան Վառնա քաղաքից ոչ հեռու։ Այս մասին հայտարարել է բուլղարացի վարչապետ Բոյկո Բորիսովը՝ փոխանցում է DW-ն։
Նրա խոսքով՝ այդ նպատակի վրա կառավարությունն աշխատում է ողջ ուժով։
Համաձայն նախագծի՝ գազը պետք է պահեստարան մտնի Ռուսաստանից, Ադրբեջանից և Թուրքմենստանից, ինչպես նաև ռումինական և բուլղարական հանքավայրերից։
Բորիսովի խոսքով՝ նախագիծն ու դրա ֆինանսական ծրագիրը մշակվում են Բուլղարիայի կառավարության կողմից՝ Եվրահանձնաժողովի հետ համատեղ։
Բուլղարիայի իշխանությունների կարծիքով՝ հանգույցի շինարարությունը, որի մասին առաջին անգամ հայտարարվել էր 2015-ի փետրվարի 9-ին Սոֆիայի էներգետիկ ֆորումի ժամանակ, թույլ կտա մասամբ դիվերսիֆիկացնել գազի մատակարարումները եվրոպական երկրներ։
Գազապահեստարանից երկնագույն վառելիքը կուղղվի Բուլղարիա, Ռումինիա և Սերբիա։ Մոտ 43 մլրդ խորանարդ մետր գազ ծրագրվում է մատակարարել Կենտրոնական Եվրոպա։
