Ցարնաև եղբայրները, որոնք կասկածվում են Բոստոնի մարաթոնի ժամանակ տեղի ունեցած ահաբեկչության կազմակերպման մեջ, սկզբում ծրագրել էին մահապարտ դառնալ և պայթյուններ իրականացնել հուլիսի 4-ին՝ ԱՄՆ անկախության օրը:
Ինչպես հայտնել է The New York Times-ը՝ այդ մասին 19-ամյա Ջոհար Ցարնաևը պատմել էր Հետաքննությունների դաշնային բյուրոյի քննիչներին ապրիլի 21-ին՝ ձերբակալությունից երկու օր անց:
Ջոհարի խոսքով՝ ինքն ու ավագ եղբայր Թամերլանը, որը մահացել է ապրիլի 19-ին՝ ոստիկանության հետ փոխհրաձգության հետևանքով, վերջնականն արդյունքում որոշել են հրաժարվել մահապարտ դառնալու գաղափարից և շուտեփուկ կաթսաներից ռումբեր պատրաստել՝ լցոնելով դրանք տարբեր մետաղական իրերով:
Պարբերականը նշում է, որ եղբայրներին հաջողվել է իրենց հաշվարկից շուտ պատրաստել ռումբերը, ինչի արդյունքում էլ որոշել են ահաբեկչության օրը տեղափոխել և կատարել ավելի վաղ՝ ապրիլի 15-ին: Այդ օրը Մասաչուսեթս նահանգում նշվել է Հայրենասերի օրն ու անցկացվել ավանդական բոստոնյան մարաթոնը:
Պայթուցիկ սարքերի պատրաստմամբ Ցարնաևները զբաղվել են Քեմբրիջում գտնվող Թամերլանի բնակարանում: Քննիչները ենթադրում են, որ նրանք սովորել են ռումբեր պատրաստել համացանցում հայտնաբերված հրահանգների օգնությամբ:
Ջոհարի խոսքով՝ ինքը եղբոր հետ մեքենայով ուսումնասիրել է Բոստոնը, որից հետո նրանք որոշել են պայթյուններ իրականացնել մարաթոնի վերջնագծում:
