Եթե իշխանությունները ԲՀԿ առաջնորդ Գագիկ Ծառուկյանի հետ վարվեն այնպես, ինչպես Խաչատուր Սուքիասյանի հետ, ներքին պայթյուն կառաջանա: Նույնիսկ Խաչատուր Սուքիասյանի ունեզրկումը չի մարսվել այս տարիների ընթացքում: «Առաջին լրատվական»-ի հետ զրույցում այս մասին ասաց Մոսկվայի «Միաբանություն» հայկական ազգային ակումբի նախագահ Սմբատ Կարախանյանն՝ անդրադառնալով «Բարգավաճ Հայաստան» կուսակցության ներկայացրած՝ ընդդիմություն դառնալու հայտին:
Սմբատ Կարախանյանը նշեց, որ դասական ընդդիմությունն այն կառույցն է, որն իշխանության կազմում և իշխանության հետ չէ, իշխանական տարբեր ծրագրերին դեմ է քվեարկում և առաջ է քաշում իր նոր, ընդդիմադիր ծրագրերը, համաձայն չէ իշխանության քաղաքականության հետ՝ լինի դա իշխանության արտաքին թե ներքին քաղաքականությունը, համարում է իրեն ընդդիմություն և պայքարում է իշխանափոխության և իր ծրագրերի իրագործման համար:
Նրա խոսքերով՝ ԲՀԿ-ն քաղաքական դաշտում իր կարգավիճակի հստակեցման ճանապարհին է կանգնած, և եթե պարզապես մի կողմ դնելու լինենք «այլընտրանքային», «իշխանական բուրգից դուրս», «իշխանական բուրգից ներս», «համագործակցող», «չհամագործակցող» ձևակերպումները, ապա պարզ է, որ ԲՀԿ-ն ընդդիմադիր կեցվածք ունի:
Սմբատ Կարախանյանը չի բացառում, որ ԲՀԿ-ն ինքնըստինքյան դառնա ընդդիմություն։ Ըստ նրա՝ կան ընդդիմության տարբեր ձևաչափեր՝ ծայրահեղ ընդդիմություն, կենտրոնախույս ընդդիմություն. ԲՀԿ-ն իր ձևը պետք է գտնի, թեև «այդ կոնտուրները կարծես թե նախագծվում են»: Իսկ սեպտեմբեր ամսվա մասին հիշատակելով՝ նրա համոզմամբ, Վարդան Օսկանյանը նկատի է ունեցել սեզոնային իրավիճակները, որոնք լինում են Հայաստանում աշնանն ու գարնանը:
«ԲՀԿ-ն իր ներուժով ունի հնարավորություններ՝ դառնալու քաղաքական ընդդիմություն և ստանձնելու քաղաքական պայքարի գիծը։ Եթե չանի դա, իր ներկայիս այլընտրանքային կեցվածքը կբերի այդ կուսակցության վերացմանը: Չի բացառվում նաև, որ այդ դեպքում ԲՀԿ-ն դառնա բիզնես-պրոյեկտ»,- նկատեց Կարախանյանը:
Եթե ԲՀԿ-ն հայտարարի ընդդիմություն դառնալու մասին, ապա, ըստ Կարախանյանի, ԲՀԿ-ից ինչ-որ մարդիկ, օրինակ՝ սերժսարգսյանական թևի ներկայացուցիչները, կհեռանան կամ տարբեր կերպով իրենց ակտիվ անդամակցությունը ԲՀԿ-ին կվերանայեն։ Թեև նրանք լուրջ դերակատարներ չեն, մի կողմ քաշված են, ըստ մեր զրուցակցի, բնական է, որ իրենց մասնակցության ձևաչափը կվերանայեն՝ կա՛մ դուրս կգան կուսակցությունից, կա՛մ էլ ձևեր կգտնեն շարունակելու ԲՀԿ-ի ներսում իրենց գոյատևումը, կա՛մ կվերանայեն իրենց հայացքները: Կարախանյանի խոսքերով՝ կմնան քաղաքական այն թևի ներկայացուցիչները, որոնք կգտնեն այն ձևերը, որի միջոցով կպաշտպանեն իրենց ունեցվածքն ու իրենց բիզնեսը:
Մոսկվայի «Միաբանություն» հայկական ազգային ակումբի նախագահը չբացառեց, որ բուրգի սնանկացման, ընդդիմադիր բիզնեսմեններին թալանելու իշխանական մեթոդները գործի կդրվեն նաև ԲՀԿ-ի դեպքում: Դա, ըստ Կարախանյանի, հասկանում է նաև ԲՀԿ-ն:
«Այստեղ ԲՀԿ-ն ունի դրական մի կարգավիճակ: ԲՀԿ-ի շատ բիզնեսները, ֆինանսական ռեսուրսները պետք է կենտրոնացված լինեն Հայաստանից դուրս: Կան շատ բիզնեսմեններ, որոնք մաս չեն կազմում քրեաօլիգարխիկ կլանին, և իրենց բիզնեսները, ներդրումները գտնվում են ՀՀ-ից դուրս: Այ, այսպես հնարավոր է ունեցվածք պահել: Այդ սխեման արդեն գործում է: Այնպես չէ, որ հիմա կվազեն, դուրս կհանեն իրենց բիզնեսները Հայաստանից: Սա շատ վատ երևույթ է, բայց իշխանությունները գործիչներին մղեցին սրան: Այն մարդիկ, ովքեր բիզնեսներ ունեն, բայց ցանկանում են քաղաքականությամբ զբաղվել, ստիպված են իրենց ֆինանսական ռեսուրսները հանել են ՀՀ-ից դուրս: Եթե Խաչատուր Սուքիասյանի օրինակը տարածվի Գագիկ Ծառուկյանի վրա, դա ներքին պայթյուն կարող է առաջացնել, քանի որ մինչև հիմա Խաչատուր Սուքիասյանի հետ պատահածը դեռևս չի մարսվել»,- ասաց Սմբատ Կարախանյանը՝ հավելելով, որ Երևանի ավագանու ընտրություններից հետո ՀՀ քաղաքական դաշտում սպասվում է կապիտալի լեգալացում բոլորի համար: Ուստի, ըստ նրա, կարևոր է քաղաքացիական ինքնակազմակերպումը:
