Գյումրեցի Ավետիսյանների յոթ հոգանոց ընտանիքի սպանության մեջ մեղադրվող ռուս զինծառայող Վալերի Պերմյակովի գործով դատական առաջին նիստը տեղի կունենա դեկտեմբերի 18-ին Գյումրիի 102-րդ ռուսական ռազմաբազայում։
Նշենք, որ այն բանից հետո, երբ հայտնի դարձավ, որ ռուսական կողմը Հայաստանի իրավապահներին է փոխանցել Պերմյակովի գործի քննությունը, անմիջապես դասալքության վերաբերյալ վճռի հրապարակումից հետո մասնագետների գնահատմամբ՝ Պերմյակովը պետք է անցներ հայ իրավապահների հսկողության տակ, և ակնկալվում էր, որ Ավետիսյանների գործով դատական նիստերը կընթանան արդեն Շիրակի մարզի առաջին ատյանի դատարանում։
Ավետիսյանների տուժողի իրավահաջոդ, փաստաբան Երեմ Սարգսյանը «Առաջին լրատվական»-ի հետ զրույցում ասաց, որ քրեական գործը քննելու է հայկական կողմը, գործը քննվելուէ Շիրակի մարզի ընդհանուր իրավասության դատարանի դատավորի կողմից, սակայն ռուսական 102-րդ ռազմաբազայի տարածքում. նիստն անցկացվելուէ արտագնա կարգով։
Երեմ Սարգսյանն ընդգծեց, որ եթե խնդիրներն իսկապես լուրջ լինեն և կոնկրետ խնդիրներ հարուցեն, ապա իրենք միջնորդություններով հանդես կգան։
Ինչ վերաբերում է մամուլում տեղ գտած այն հրապարակումներին, թե Վալերի Պերմյակովը կարող է կրել իր պատիժը Ռուսաստանում, Երեմ Սարգսյանն արձագանքեց, որ առայժմ վաղ է սրան անդրադառնալը, դեռ չկա ազատազրկման դատավճիռ:
Գյումրեցի քաղաքագետ Գագիկ Համբարյանի խոսքերով՝ ռուսական կողմը մտավախություն ունի Պերմյակովի ֆիզիկական անվտանգության համար, այդ պատճառով էլ դատական նիստը տեղի կունենա ռուսական ռազմաբազայում․ գյումրեցիները, սակայն, ըստ Համբարյանի, հասկանում են, որ դատական գործն ամբողջությամբ շինծու է։
Համբարյանը նշում է՝ գոնե առաջին 4-5 տարիները Պերմյակովը իր դատավճիռը պետք է կրի Հայաստանում, և եթե հետագայում պետք է պատիժը կրի Ռուսաստանում,ապա միայն հայազգի վարորդ Հրաչյա Հարությունյանի հետ փոխանակման միջոցով։
Հիշեցնենք, որ զենքով դասալքության, զենք-զինամթերք հափշտակելու և ապօրինի կրելու մասով ռուսական դատարանը Պերմյակովին դատապարտել է տասը տարվա ազատազրկման:
