Ստամբուլի հայկական «Ակօս» թերթի փոխանցմամբ` «Ակօս» թերթի նախկին խմբագրապետ Հրանտ Դինքի սպանության գործով պաշտոնյաների մեղադրական եզրակացությունն ուղարկվել է Ստամբուլի՝ ծանր հանցանքները քննող 14-րդ դատարան։
Մեղադրական ակտը սրանից առաջ երկու անգամ հետ է ուղարկվել գլխավոր դատախազության կողմից։ Ստամբուլի՝ ծանր հանցանքները քննող 14-րդ դատարան ուղարկված մեղադրական ակտը պատրաստել է հետաքննող դատախազ Գյոքալփ Քյոքչուն։
Դրանում պահանջվում է ազատազրկման դատապարտել 26 կասկածյալի, այդ թվում նաև Էնգին Դինչին, Ահմեթ Իլհան Գյուլերին, Ջելալեթին Ջերահին ու Ռեշաթ Ալթային, որոնք պատասխանատու պաշտոններ են վարել և անփութություն են ցուցաբերել Դինքի սպանության ժամանակաշրջանում։
Ստամբուլի՝ ծանր հանցանքները քննող 14-րդ դատարանն այժմ իր տրամադրության տակ ունի 15 օր՝ մեղադրական ակտն ընդունելու կամ մերժելու համար։ Ավելի վաղ Գլխավոր դատախազությունը «թերությունների հիմնավորմամբ» երկու անգամ հետ է ուղարկել Գյոքալփ Քյոքչուի պատրաստած մեղադրականը։
Մեղադրականում պահանջվում է 20-25 տարի ժամկետով ազատազրկման դատապարտել Դինքի սպանության ժամանակ Տրապիզոնի ոստիկանության հետախուզության վարչության պետ Էնգին Դինչին, Տրապիզոնի ոստիկանապետ Ռեշաթ Ալթային ու Ստամբուլի ոստիկանության հետախուզության վարչության պետ Ահմեթ Իլհան Գյուլերին՝ նրանց մեղավոր ճանաչելով Թուրքիայի քրեական օրենսգրքի 83-րդ հոդվածը (անփութության պատճառով կանխամտածված սպանության պատճառ դառնալ) խախտելու համար։
Դինքի սպանության ժամանակ Ստամբուլի ոստիկանապետ Ջելալեթին Ջերահն էլ մեղադրվում է ծառայողական լիազորությունների չարաշահման համար։
