Միջազգային հանրությունը բախվել է «նոր տեսակի թշնամու» հետ՝ ի դեմս ԴԱԻՇ խմբավորման: Հենց այդ պատճառով էլ Արքայական ռազմաօդային ուժերի գործողությունը Սիրիայում «արագ կամ հասարակ չի լինի»: Այս մասին հայտարարել է Մեծ Բրիտանիայի պաշտպանության նախարար Մայքլ Ֆելոնը Կիպրոսում «Ակրոտիրի» ռազմաբազա այցի ընթացքում՝ գրում է TASS-ը:
«Մենք նոր տեսակի թշնամու հետ ենք բախվել, որը պահանջներ չի առաջադրում, գերիներ չի վերցնում և բանակցությունների չի ձգտում: Այդ թշնամին Միացյալ Թագավորությանն անմիջական սպառնալիք է ներկայացնում, և դրա արմատը Սիրիայում է»,- ասել է Ֆելոնը:
Նախարարը խոստացել է նվազագույնի հասցնել սիրիացի խաղաղ բնակչության շրջանում զոհերը, քանի որ բրիտանական ռազմաօդային ուժերը կհարվածեն «ոչ միայն ենթակառուցվածքներին», այլև հակառակորդի կենդանի ուժի կուտակումներին, ինչը կարող է նաև ուղեկցվել այլ կորուստներով:
«Ոչ ոքին դուր չեն գալիս ռմբակոծությունները, պատերազմը՝ որպես այդպիսին: Այնուամենայնիվ, երբ գործ ունես մարդկանց հետ, ովքեր բանակցություններ չեն ցանկանում, այլ միայն ցանկանում են սպանել առավելագույն թվով Արևմուտքի բնակիչների, մասնավորապես` բրիտանացիների, ստիպված ենք ուժ կիրառել»,- խոստովանել է նա:
