Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադիի հետ հանդիպման ժամանակ ՀՀ առողջապահության նախարար Արմեն Մուրադյանը շնորհավորել է նրան պատասխանատու պաշտոնում նշանակվելու կապակցությամբ` կարևորելով բարեկամ երկրի հետ համագործակցության ընդլայնումն ու զարգացումը։ Այս մասին տեղեկացրին ՀՀ առողջապահության նախարարությունից:
«ՀՀ առողջապահության նախարարության և Իրանի Իսլամական Հանրապետության առողջապահության և բժշկական կրթության նախարարություններն առողջապահության տարբեր ոլորտներում համագործակցության Փոխըմբռնման հուշագիր են ստորագրել տասը տարի առաջ»,-ասել է նախարարը` ընդգծելով համագործակցության նոր ուղղություններ նախանշելու անհրաժեշտությունը։ 2014թ. դեկտեմբերին Թեհրանում կայացած հայ-իրանական միջկառավարական հանձնաժողովի նիստի ժամանակ ձեռք բերված պայմանավորվածության համաձայն, հայկական կողմը մշակել է Փոխ ըմբռնման հուշագրի նոր նախագիծ և դիվանագիտական խողովակով փոխանցել իրանական կողմին։
Սեյեդ Քազեմ Սաջադին, որ բարձրագույն իր կրթությունն սկսել է բժշկական համալսարանից, պատրաստակամություն է հայտնել մեծապես աջակցել առողջապահության տարբեր ոլորտներում երկու երկրի համագործակցուկթյան հետագա ընդլայնմանն և զարգացմանը։ Նա հավաստիացրել է, որ դրա համար լավ նախադրյալներ կան` ներկայացնելով Իրանի Իսլամական Հանրապետության առողջապահության և դեղագործության ոլորտում ունեցած ձեռքբերումները։
Արմեն Մուրադյանն անդրադարձել է Հայաստանի Հանրապետության առողջապահության համակարգում իրականացվող բարեփոխումներին ու ձեռքբերումներին։ Կարևորելով հանրային առողջապահական ծրագրերը` նա նշել է, որ իմունականխարգելման ազգային ծրագրի արդյունավետ իրականացման շնորհիվ երկրում վարակիչ հիվանդություններից մահացության ցուցանիշը ցածր է 1 տոկոսից: «Մենք պատրաստ ենք համագործակցել նաև ոչ վարակիչ հիվանդությունների հաղթահարման գործում»,-ասել է նախարարը` ընդգծելով առանձին ոլորտներում Հայաստանի ձեռքբերումները, ինչպես նա և գերակա ուղղությունները։
Քննարկվել են առողջության պահպանման, բժշկության, դեղագործության, կրթության և այլ ոլորտներում համագործակցության ընդլայնման և զարգացման հնարավորությունները։
