Փարիզյան ահաբեկչությունները խթան դարձան Ռուսաստանի և ԱՄՆ-ի գլխավորած կոալիցիայի համագործակցության համար, որոնք ցանկանում են միավորել իրենց ուժերը ԴԱԻՇ-ի կողմնակիցների դեմ պայքարի համար: Այս մասին գրում է The Wall Street Journal թերթը:
Նշվում է, որ Ֆրանսիան, Ռուսաստանը և ԱՄՆ-ը աստիճանաբար հեռանում են հնարավոր համագործակցության մասին պարզ խոսակցություններից և անցնում «մեծ միասնական կոալիցիայի ստեղծման»:
Չորեքշաբթի ԱՄՆ նախագահ Բարաք Օբաման հայտարարել է, որ եթե Ռուսաստանը պատրաստ է կենտրոնանալ ԴԱԻՇ-ի դեմ պատերազմի վրա, ապա ԱՄՆ-ը կաջակցի Մոսկվայի հետ համագործակցությանը այդ ռազմական արշավի շրջանակներում:
Պարբերականը հայտնում է, որ երեքշաբթի Ֆրանսիայի նախագահ Ֆրանսուա Օլանդը զանգահարել է Ռուսաստանի նախագահ Վլադիմիր Պուտինին՝ քննարկելու հնարավոր համատեղ ծրագրերը: Օլանդը նաև ծրագրում է հաջորդ շաբաթ այցելել Մոսկվա և Վաշինգտոն:
Ըստ հոդվածագրի՝ չնայած Սիրիայի ապագայի հարցում տարաձայնություններին՝ երկրներն առաջընթացի նշաններ են ցուցաբերում ջիհադիստների դեմ գլոբալ դաշինքի ստեղծման գործում: Նա նշում է, որ երեքշաբթի Ռուսաստանն ԱՄՆ-ին նախապես տեղեկացրել է, որ պատրաստվում է հարվածներ հասցնել տարածաշրջանում: Պարբերականն ընդգծում է, որ սեպտեմբերի 30-ին սկսված սիրիական ռազմական արշավի սկզբից Ռուսաստանն առաջին անգամ է ամերիկացի գործընկերներին նախօրոք տեղեկացրել օդային ռմբակոծությունների մասին:
Պարբերականը նշում է, որ դեռ բոլորովին վերջերս այդպիսի համագործակցությունը կարող էր անիմաստ թվալ Ղրիմի բռնակցմանն արձագանքի և տնտեսական պատժամիջոցների պատճառով, բայց Վլադիմիր Պուտինն այլևս ԱՄՆ-ի և Եվրոպայի աչքում «համաշխարհային հանցագործ» չի թվում: Ներկայումս նա անփոխարինելի մարդ է ԴԱԻՇ-ի դեմ պայքարում՝ գրում է The Wall Street Journal-ը:
