Լկտիաբար ծիծաղելով, խաղալով իր զոհերի դիակների հետ, այդ սառսռեցնող տեսանյութում ԴԱԻՇ-ի դահիճը, ում համարում են Փարիզի ահաբեկչության կազմակերպիչը, դիակների կույտը քարշ է տալիս իր մեքենայի հետևից Սիրիայում, հայտնում է dailymail.co.uk-ը:
Ծայրահեղականը 27-ամյա բելգիացի Աբդելհամիդ Աբաուդն է՝ ԴԱԻՇ-ի գլխավոր հավաքագրողներից և աշխարհում պատերազմի ամենափնտրվող հանցագործներից մեկը:
Ենթադրվում է, որ նա հազարավոր երիտասարդ ջիհադիստների է համոզել գնալ Սիրիա, ներառյալ իր 13-ամյա եղբորը` Յունեսին:
Տեսանյութում իր մեղսակիցների հետ նա ժպտում է և կատակում է` մարմինները տանելով մասսայական գերեզմանոց, որտեղ դրանք պետք է նետվեն: Աբաուդն ասում է, որ նա իր ընկերների հետ քարշ է տալիս «անհավատներին, ովքեր կռվում են մեր դեմ»:
Նա ասում է. «Առաջ մենք Մարոկկոյում արձակուրդներին քարշ էինք տալիս մոտորանավակներ, մոտոցիկլեր, նվերներով լցված բեռնատարներ: Հիմա, փառք Աստծու, հետևելով Աստծո ուղուն, մենք քարշ ենք տալիս հավատուրացների, անհավատների, ովքեր կռվում են մեր դեմ»:
Պարզ չէ, թե դա Սիրիայի որ մասում է տեղի ունեցել:
Բելգիայում Աբաուդը հեռակա կերպով դատապարտված է 20 տարվա բանտարկության այն բանից հետո, երբ նրա հայրը նրա դեմ բողոք է ներկայացրել ոստիկանություն` իր փոքր եղբորը ծայրահեղական դարձնելու մեղադրանքով:
Նա Բրյուսելի Մոլենբիկ ծայրամասից է, որը հայտնի է որպես «Եվրոպայի ջիհադի մայրաքաղաք»: Ենթադրվում է, որ Փարիզի ահաբեկիչներն իրենց զենքերն ու ինքնասպանական գոտիները ստացել են այնտեղից, որոնք վարձակալած մեքենաներով տարվել են Ֆրանսիա:
Աբաուդը նույնիսկ հայտնվել է օնլայն ԴԱԻՇ ահաբեկչական Dabiq ամսագրում, որում նա իր կյանքը նկարագրում է որպես ջիհադականի: Ըստ հարցազրույցի՝ նա ճանապարհորդել է Սիրիա՝ «ահաբեկելու խաչակիրներին, ովքեր պատերազմ են մղում մահմեդականների դեմ»: Նա ասում է. «Բելգիան խաչակրաց կոալիցիայի անդամ է, որոնք հարձակվում են Իրաքի և Շամի մահմեդականների վրա (Սիրիայում)»:
Ֆրանսիայի ոստիկանությունը հայտնել է, որ Աբաուդը ահաբեկչությունը պլանավորել է Սիրիայից` աջակցություն ստանալով Բելգիայում և Ֆրանսիայում:
Բրյուսելից 26-ամյա Սալեհ Աբդեսլամը Բելգիայի սահմանապահների կողմից ահաբեկչությունից ժամեր անց կանգնեցվել է և հետո ազատ արձակվել: Այժմ բելգիական ոստիկանությունը հակաահաբեկչական արշավ է անցկացնում նրան բռնելու համար: Որոշ աղբյուրների տվյալներով՝ նա այժմ թաքնված է:
Ներկայումս մեկ մարդ է ձերբակալվել, սակայն չի հաստատվել, թե դա Աբդեսլամն է:
