Փարիզում իրականացված ահաբեկչությունները, որոնք ակնհայտորեն համաձայնեցված էին, տեղի են ունեցել միանգամից մի քանի վայրերում տարբեր մեթոդների կիրառմամբ՝ ասված է հեղինակավոր Stratfor վերլուծական կենտրոնի անդրադարձում, որում ահաբեկչություններից հետո սպասվելիք իրադարձությունների իր կանխատեսումներն է արել:
Ահաբեկչությունների առաջին ալիքը երկու մահապարտների իրականացրած հարձակումն էր Stade de France-ում, որտեղ այդ պահին անց էր կացվում Գերմանիա-Ֆրանսիա ֆուտբոլային հանդիպումը (խաղին ահաբեկչության պահին ներկա էր նաև Ֆրանսիայի նախագահ Ֆրանսուա Օլանդը. նրան հեռացրել են դեպքի վայրից, այնուհետև նա հանդիպել է ՆԳ նախարար Բեռնար Կազանևի հետ): Հայտնի չէ, թե ահաբեկչության ժամանակ օգտագործվե՞լ են արդյոք նռնակներ կամ այլ պայթուցիկներ. հնարավոր է մահապարտների մասնակցությունը ահաբեկչությանը:
Այդ նույն ժամանակ զինված անձինք մեքենայով անցնելով կամբոջիական ռեստորանի կողքով՝ կրակ են բացել մարդկանց վրա: 25 րոպե անց զինված մարդիկ կրակ են բացել Շարոն փողոցում, և առաջին ահաբեկչությունից մեկ ժամ անց հարձակում է իրականացվել Լուվրի և Les Halles առևտրական կենտրոնի վրա:
Ոստիկանության հատուկ ստորաբաժանումները հսկողություն են իրականցնում 10-րդ և 11-րդ շրջաններում՝ ռեստորանների, բարերի և մարզադաշտի շրջակայքում: Փարիզի այդ հատվածները շատ են այցելում զբոսաշրջիկները և երիտասարդությունը: Betaclan համերգասրահում ահաբեկիչները մոտ 100 հոգու պատանդ են վերցրել:
Հնարավոր է՝ Փարիզում իրադարձությունները զարգանան կայծակնային արագությամբ. ցանկացած պահի իրավիճակը Betaclan համերգասրահում կարող է փոխվել, եթե հատուկ ծառայության աշխատակիցները համարեն, որ ահաբեկիչները պատրաստվում են կրակ բացել պատանդների վրա:
Փարիզի ահաբեկչությունները ցնցող, սակայն սպասելի իրադարձություններ էին՝ կարծում են Stratfor-ի վերլուծաբանները: Ֆրանսիայի և եվրոպական այլ երկրների շատ քաղաքացիներ Սիրիայում միացել էին ծայրահեղականների խմբավորումներին: Կարևոր է այժմ այն հարցը, թե այդ ահաբեկչությունները իրենց բնույթով «տեղակա՞ն են», թե՞ հարձակվողները պատրաստվել և օգնություն են ստացել արտասահմանից՝ մասնավորապես ԴԱԻՇ-ի կամ Ալ-Քաիդայի կողմից: Իսկ փախստականների հոսքը Եվրոպա ուժեղացնում է ջիհադականների՝ Եվրոպա մուտք գործելու վտանգը:
Անկասկած այս ահաբեկչությունները քաղաքական հետևանքներ կունենան: 5 օր հետո Ֆրանսիայի միակ ավիակիր նավը՝ «Շարլ դե Գոլը», պետք է մեկնի Պարսից ծոց՝ Իրաքում և Սիրիայում ԴԱԻՇ-ի դեմ պայքարելու համար: Եթե հաստատվի, որ Փարիզում ահաբեկչություն իրականացնողը ԴԱԻՇ-ն է, ապա, իհարկե, Ֆրանսիան ավելի կակտիվացնի իր մասնակցությունը ԴԱԻՇ-ի դեմ պայքարին, և դա այն ժամանակ, երբ Սիրիայում իրավիճակը գնալով ավելի խճճվում է և ավելի մեծ թվով մասնակիցների է ներգրավում:
Քաղաքական տեսանկյունից Փարիզի ահաբեկչությունները հիշեցնում են Ֆրանսիայի նախկին էթնիկ լարվածությունների մասին: Նախորդող մի քանի ամիսների ընթացքում ուշադրությունը այդ հարցով կենտրոնացած էր հարևան Գերմանիայի վրա: Փախստականներից շատերը արևելքից և հարավից գալիս են Գերմանիա, և նրանցից քչերն են շարունակում իրենց ճանապարհը դեպի Ֆրանսիա: Արդյունքում Ֆրանսիան առանձնապես չէր խառնվում փախստականների խնդրի վերաբերյալ հարցի լուծմանը: Թեպետ կիսում էր Գերմանիայի այն առաջարկը, որ փախստականները պետք է տեղաբաշխվեն ողջ Եվրոպայով մեկ: Այնուամենայնիվ կարելի է սպասել, որ ահաբեկչությունները կուժեղացնեն այն դիրքորոշումը, որ պետք է կանգնեցվի փախստականների հոսքը և փակվեն եվրոպական շատ երկրների սահմանները:
Ահաբեկչություններից հետո հնարավոր է աճի Մարի Լե Պենի ղեկավարած «Ազգային ճակատ» կուսակցության հեղինակությունը: Հայտնի է, որ այս կուսակցությունը կողմ է փախստականների հոսքը դադարեցնելուն:
Լուսանկարը` PAN Photo-ի
