ԵԱՀԿ Մինսկի խմբի համանախագահները հինգշաբթի հանդես են եկել հայտարարությամբ, որում պարտավորվել են շարունակել աջակցել հակամարտող կողմերին ԼՂ հարցի «խաղաղ և բազմակողմանի կարգավորումը խթանելու համար»՝ համաձայն իրենց մանդատի: Նրանց հայտարարությունը հրապարակված է ԵԱՀԿ կայքում:
Փաստաթղթում նշվում է, որ Մինսկի խմբի ձևաչափը յուրահատուկ է և հարմար ինչպես հակամարտող կողմերին, այնպես էլ համանախագահ երկրներին: «Հաշվի առնելով բանակցությունների զգայունությունը՝ ձևաչափը փոխելու կամ զուգահեռ մեխանիզմներ ստեղծելու փորձերը կարող են վնասել բանակցային գործընթացին և խանգարել արդեն արձանագրված առաջընթացին»,- ասվում է հայտարարության մեջ:
Միևնույն ժամանակ համանախագահները հայտարարել են «արդար և կայուն կարգավորման» որոնումներով շահագրգռված միջազգային կազմակերպությունների հետ համագործակցելու պատրաստակամության մասին:
Մեկնաբանելով Ղարաբաղյան հարցով ԵԽԽՎ-ում քննարկվող զեկույցը՝ համանախագահները նշել են. «Մենք կիսում ենք անհանգստությունը, որն արտահայտված է (ԵԽԽՎ) զեկույցում՝ կապված Հայաստանի և Ադրբեջանի սահմանին լարվածության աճի հետ: Մենք խորապես ցավում ենք կորուստների համար, որոնց շարքերում են նաև քաղաքացիական անձինք: Մենք համաձայն ենք, որ հակամարտությունը չափազանց երկար է տևում: Կողմերը պետք է ձեռնարկեն կարգավորման համար անհրաժեշտ բոլոր միջոցները»,- նշել են միջնորդները:
