Թուրքիայի իշխանությունները շարունակում են ազատ մամուլի ճնշմանն ուղղված իրենց գործողությունները: Այս անգամ ոստիկանությունը խուզարկություն է անցկացրել Ֆեթուլլահ Գյուլենին հարող թուրքական հայտնի «Զաման» պարբերականի հրատարակչատանն ու խմբագրատանը:
«Զաման»-ի փոխանցմամբ՝ ոստիկանությունը որպես հիմնավորում բերել է այն փաստը, թե հրատարակչատանն անօրինական կերպով փորձ է արվել թողարկել Özgür Bugün խորագրով նոր պարբերական: Ոստիկանության փոխանցմամբ՝ դրա հրատարակումը ձեռնարկել են գյուլենական համարվող Ipek Koza մեդիահոլդինգի կազմի մեջ մտնող Bugün և Millet պարբերականների այն աշխատակիցները, ովքեր հեռացվել են աշխատանքից իշխանությունների նշանակված վերակացուի կողմից:
Իրավապահները ներխուժել են ոչ միայն «Զաման»-ի գրասենյակ, այլև Aksiyon և Todays Zaman պարբերականների խմբագրություններ: Նշվում է, որ ոստիկանները խուզարկել են անգամ լրագրողների անձնական իրերը:
«Զաման»-ի աշխատակիցներն ու ընթերցողները, իմանալով ոստիկանության կողմից իրականացված հերթական հարձակման մասին, հավաքվել են պարբերականի խմբագրատան շենքի առջև և իրենց աջակցությունը հայտնել «Զաման»-ին:
