Արարատի մարզում ձկնարտադրությամբ զբաղվող «Գարբուշ» ընկերության աշխատակիցները փաստում են՝ իրացման ծավալները նվազել են, եթե նախկինում ձկնարդյունաբերությունն իրենց համար շահեկան բիզնես էր՝ հիմա արդեն ռիսկային է: Փոխարենը, գյուղատնտեսության նախարարությունում ձկնարտադրությամբ զբաղվելը ռիսկային չեն համարում: Նախարարության տվյալներով՝ արտադրության և արտահանման ծավալների աճ կա: 2013-ին արտադրվել է 11520 տոննա, 2014-ին շուրջ 13950 տոննա, որից արտահանվել է 2700 տոննան: Գյուղատնտեսության Անասնաբուծության և անասնաբուժության վարչության աշխատակից Տիգրան Առաքելյանի հավաստմամբ՝ 2015-ին աճի տեմպերը ևս շարունակվել են՝ ռուբլու տատանումներն էլ չեն խանգարել:
Չնայած գյուղատնտեսության նախարարությունում հավաստիացնում են, որ ոլորտը կայուն զարգանում է, կառավարություն էլ աջակցում է արտադրողներին, օր օրի պակասում է ձկնարտադրությամբ զբաղվող ընկերությունների թիվը, ոլորտում հակամրցակցային իրավիճակ է: Հիշեցնենք, որ այս տարվա հուլիսի 9-ին ձկնամթերքի արտադրությամբ զբաղվող առաջատար եղած «Յունիֆիշ»-ը սնանկ է ճանաչվել, ընկերության սեփականատեր Արմեն Մկրտչյանը նույնիսկ հեռացել է Հայաստանից։ Ժամանակին իր բիզնեսը հզորացնելու ու նոր գործարան կառուցելու համար ընկերությունը 14 մլն դոլարի վարկ է վերցրել «ԱԿԲԱ-կրեդիտ ագրիկոլ» բանկից, 700 հազար եվո էլ՝ HSBC-ից ու սնանկ է ճանաչվել։ Այժմ «Յունիֆիշը» տնօրինում է «ԱԿԲԱ» բանկը: Գյուղտնտեսության նախարարության ներկայացուցչից հետաքրքրվեցինք՝ ինչպես է, որ ռուբլու տատանումը միայն այս ընկերության վրա է ազդել, գուցե կառավարության աջակցության պարագայում նման իրավիճակում ընկերությունը չէր հայտնվի, հիշեցնքնեք, որ «Յունիֆիշի» սնանկության գործով կառավարիչ Հարութ Ղարիբյանը մի շարք լրատվամիջոցների հետ զրույցում նշել էր, որ ընկերությունը 2 ամիս չի կարողացել արտադրություն ապահովել, ձկնաբուծարանը հոսանքազրկված է եղել 50 մլն դրամ պարտքի պատճառով:
Գյուղատնտեսության նախարարության ներկայցուցչից հետաքրքվեցինք՝ գուցե ձկնարտադրողները կանգնած են փաստի առաջ այն պատճառով, որ այս ոլորտում գործունեություն են ծավալում վարչապետ Հովիկ Աբրահամյանի եղբայրը՝ Ջոնիկ Աբրահամյանը, ԱԺ պատգամավորներ Գագիկ Ծառուկյանը և Սամվել Ալեքսանյանը, ուստի, ոլորտում հակամրցակցային իրավիճակ է ստեղծվել: Տիգրան Առաքելայնը միանգամից հերքեց, նրա խոսքով՝ ընկերություններից մեկի սննկացումը, չի նշանակում, որ հակամրցակցային պայմաններ են ստեղծված: Տիգրան Առաքելյանին հակադարձում է «Հայ ձկնարտադրողների և ձկնարտահանողների միասնություն» ՀԿ նախագահ Արթուր Աթոյանը: Ըստ նրա՝ ձկնարտադրությամբ զբաղվող, գրանցված 234 ընկերությունից փաստացի գործում են շուրջ 100-ը: Ըստ նրա՝ արտադրողներն իրենց ապրանքը վաճառում լիկվիդացիոն գներով, շուկայականից 400 դրամով ավելի պակաս, արտահանման հետ կապված էլ խնդիրներ կան, չգիտես ինչու, գյուղտնտեսության նախարությունն էլ բացարձակապես չի տիրապետում իրավիճակին:
Արթուր Աթոյանի խոսքով՝ եթե այս տեմպերը շարունակվեն, ապա կմնան ընդամենը 8 խոշոր ձկնարտադրող: Այսինքն, ոլորտն ամբողջությամբ կմոնոպոլիզացվի: Հարց է ծագում, գուցե սա է ուզում կառավարությունը:
