Freedom House իրավապաշտպան կազմակերպությունը հրապարակել է աշխարհի երկրներում համացանցի ազատության 2015 թվականի զեկույցը։ Հայաստանն ազատ համացանց ունեցող երկրների շարքում է: Այդ առումով ազատ է նաև Վրաստանը: Թուրքիայում և Ադրբեջանում համացանցը մասամբ ազատ է, իսկ Իրանում՝ ոչ ազատ: Եվրասիական տնտեսական միության անդամ Ռուսաստանում, Ղազախստանում և Բելառուսում համացանցը համարվում է ոչ ազատ։
Freedom House-ը նշում է, որ արդեն 5-րդ տարին է, ինչ աշխարհի մասշտաբով նկատելի է համացանցային ազատությունների սահմանափակում: Ավելի շատ կառավարություններ են գրաքննության ենթարկում հանրային հետաքրքրություն ներկայացնող տեղեկատվությունը, մեծանում է նաև վերահսկողությունը, ավելանում են անձնական տվյալների գաղտնիությանն առնչվող խախտումները:
Ըստ Freedom House-ի զեկույցի՝ համացանցից օգտվողների 61 տոկոսն ապրում է այնպիսի երկրներում, որտեղ կառավարության, բանակի կամ գերիշխող ընտանիքների մասին քննադատական նյութերը գրաքննության են ենթարկվում:
Ըստ զեկույցի, ուսումնասիրված 65 երկրներից 42-ի իշխանությունները մասնավոր ընկերություններից կամ համացանցային օգտատերերից պահանջել են սահմանափակել կամ հեռացնել քաղաքական, կրոնական կամ սոցիալական խնդիրների մասին նյութերը: 65 երկրներից 40-ում այդ բովանդակությամբ նյութերի տարածման համար բանտարկված մարդիկ կան։
Համացանցի ազատությունների ամենախիստ սահմանափակումները գործում են Չինաստանում, Սիրիայում և Իրանում։
