Երեկ՝ հոկտեմբերի 25-ին, «Մետաքս»-ի մոտ տեղի ունեցած կրակոցների վերաբերյալ «Առաջին լրատվական»- ին ուշագրավ մանրամասներ են հայտնի դարձել։ Ըստ այդմ՝ երեկ ուշ երեկոյան հիշյալ տարածքում «Մետաքս Գոլդ»-ի աշխատակիցներ, եղբայրներ Վահագ Գ.-ն և Վլադիմիր Գ.-ն կենցաղային հարցի շուրջ վիճաբանության են բռնվել քրեական հեղինակություն, Մետաքսի Պելեի աներորդու՝ Դավիթի հետ։ Վերջինս նախկինում քրեական հեղինակություն համարվող Մետաքսի Մայիսիկի եղբոր որդին է։ Վիճաբանությունն ավարտվել է կրակոցներով։ Ըստ մեզ հասած տեղեկությունների՝ Դավիթը, որը միշտ աչքի է ընկնում վիճաբանություններին իր մասնակցությամբ, կրակոցներ է արձակել Վահագի և Վլադիմիրի ուղղությամբ։ Կրակոցներից տուժել են ևս երկու երիտասարդներ, որոնք այս պատմության հետ որևէ առնչություն չունեն։
Նշենք, որ Վահագը և Վլադիմիրը թաղային հեղինակություն համարվող Կաբել Արթուրի շրջապատից են։ Վերջինս էլ մտերմիկ հարաբերությունների մեջ է ՀՀ կապի և տրանսպորտի նախարար Գագիկ Բեգլարյանի՝ Չոռնի Գագոյի հետ։ Հայտնի է, որ Մետաքսի Պելեի աներորդի Դավիթը լավ հարաբերությունների մեջ չէ Բեգլարյանի և նրա շրջապատի հետ։ Դրա համար էլ Բեգլարյանի շրջապատի հետ անընդհատ ընդհարումների մեջ է։ Ինչպես մեզ փոխանցեցին՝ նրանց միջև վիճաբանությունների պատճառը միշտ լինում է այն, որ Գագիկ Բեգլարյանի շրջապատի տղաները փորձում են իրենց, այսպես ասած, կարգերը հաստատել տվյալ տարածքում, ինչն էլ չի ընդունվում Դավիթի կողմից։
Մեր աղբյուրների փոխանցմամբ՝ կողմերն արդեն հաշտվել են, և թեման փակ է։ Գիշերը Վահագի և Վլադիմիրի հայրը հանդիպում է ունեցել մյուս կողմի հետ և հաշտություն կքնել։ Այս հաշտության մեջ թե ինչքանով դերակատարում ունի նախարար Բեգլարյանը՝ դժվար է ասել։ Բայց այն, որ հարցի լուծմանը «խառնվել են» թաղային և քրեական հեղինակությունները՝ փաստ է։ Վերջում հավելենք, որ փաստի առթիվ Քննչական կոմիտեում հարուցվել է քրեական գործ։ Նշանակվել են ԴԲՓ-ներ: Կատարվում է նախաքննություն:
