Կիպրոսյան օրենսդիրներն այսօր ժամանակավորապես դադարեցրել են այն անհատների և կազմակերպությունների վերաբերյալ հետաքննությունները, որոնք մինչև մարտի 16-ը Կիպրոսի բանկից և Կիպրոսի ազգային բանկից միլիոնավոր եվրոներ են դուրս բերել: Այս քայլն արվել ի նշան երկրի ԿԲ-ի դեմ բողոքի, որը չի ցանկանում ներկայացնել պահանջված տեղեկատվությունը:
Ինչպես լրագրողներին հայտարարել է էթիկայի հանձնաժողովի նախագահ Դիմիտրիս Սիլլուրիսը, ինքը միայն 6 հազար ֆիզիկական և իրավաբանական անձանց տվյալներ է ստացել, որոնք մարտի 1-15-ը միլիոնավոր եվրոներ են հանել իրենց բանկային հաշիվներից և արտասահման են ուղարկել: Սակայն, նրա խոսքերով, օրենսդիրները խնդրել են բանկերին մեկ տարվա տվյալները ներկայացնել: Սիլլուրիսը նշել է, որ այդ տվյալները հարկավոր են, որպեսզի պարզվի՝ արդյո՞ք բանկերը քաղաքական գործիչներին ցածր տոկոսադրույքով վարկեր չեն տրամադրել: Դրանից բացի, էթիկայի հանձնաժողովի նախագահը իր կասկածն է հայտնել, որ բանկի ներկայացրած 6 հազարանոց ցուցակը լիարժեք է:
Իր հերթին ԿԲ-ն իր ուղեկցող գրության մեջ նշել է, որ «պահանջվող տեղեկատվության ծավալը հսկայական է», և խնդրել է վերաձևակերպել հարցը: ԿԲ-ի կարծիքով՝ մեկ այլ հարց էլ է ծագում. արդյո՞ք պատգամավորների հարցումը չի հակասում բանկային գաղտնիքի պահպանման մասին օրենքին:
Կառավարության և ԿԲ-ի միջև հարաբերություններն ավելի են սրվել այն բանից հետո, երբ այսօր Կիպրոսի նախագահ Նիկոս Անաստասիադիսը չեղյալ է համարել ԿԲ-ի նախագահի տեղակալ Սպիրոս Ստավրինակիսի նշանակման մասին որոշումը: Հատկանշական է, որ հենց Ստավրինակիսն է պատասխանել պատգամավորների հարցմանը, որն այսօր այդքան դուր չի եկել օրենսդիրներին: