Թուրքական Hurriyet թերթի փոխանցմամբ՝ Ֆինլանդիայի նախագահ Սալուի Նիինիստյոն Անկարա այցելելու նախօրեին կատակել է, թե՝ հուսով է, որ չի մոլորվի Թուրքիայի նախագահ Ռեջեփ Էրդողանի նստավայրում, ինչի համար էլ հավանաբար հետը կվերցնի կողմնացույց:
«Հուսով եմ, որ չեմ մոլորվի (նախագահական նստավայրում)։ Հնարավոր է՝ հետս կողմնացույց վերցնեմ։ Մենք սովոր չենք պալատների, Ֆինլանդիան մշտապես աղքատ երկիր է եղել»,- ասել է նա:
«Աք Սարայ» պալատի կառուցումն Անկարայում մեկնարկել է 2011 թվականին։ Սկզբնական շրջանում ենթադրվում էր, որ այն կդառնա Թուրքիայի վարչապետի նստավայրը, սակայն երբ Էրդողանը դարձավ Թուրքիայի նախագահ, շենքը դարձավ նախագահական նստավայր։ Թուրքիայի ֆինանսների նախարար Մեհմեթ Շիմշեքի խոսքով՝ 1000 սենյակից բաղկացած պալատի կառուցումն արժեցել է 615 միլիոն դոլար։
