Մեծ Բրիտանիայի թագուհու թոռան՝ արքայազն Ուիլյամի և նրա կնոջ՝ Քեյթ Միդլթոնի երեխան լույս աշխարհ կգա հուլիսի կեսերին: Ինչպես հաղորդում է ITAR-TASS-ը՝ վկայակոչելով բրիտանական ԶԼՄ-ները, այս մասին անձամբ հայտարարել է Քեմբրիջի դքսուհին՝ Ուիլյամի հետ Շոտլանդիայի Գլազգո քաղաք այցելության ժամանակ:
Հարցին՝ ե՞րբ կծնվի նրանց առաջնեկը, ապագա մայրիկը պատասխանել է. «Մոտ հուլիսի կեսին, սակայն երեխաներն ունեն իրենց սեփական ծրագրերը»:
Քեյթը հաղորդել է, որ Ուիլյամի հետ անուն են ընտրում ապագա երեխայի համար: Միաժամանակ նա հասկացրել է, որ դեռևս չգիտեն՝ կծնվի աղջի՞կ, թե՞ տղա:
«Մենք ունենք տղամարդկանց և կանանց անունների «կարճ ցուցակ», սակայն դա շատ բարդ է: Իմ ընկերուհիները տեքստային հաղորդագրություններ են ուղարկում ինձ և անուններ են առաջարկում»,- ասել է Քեմբրիջի դքսուհին:
