«Վեցյակի» երկրների և Իրանի բարձրաստիճան դիվանագետները երկրորդ անգամ կհանդիպեն Ալմաթիում՝ քննարկելու իրանական միջուկային խնդրի կարգավորման ուղիները: Նախորդ՝ փետրվարին տեղի ունեցած ռաունդն ավարտվել էր առանց արդյունքի: Այս մասին հայտնում է RIA Novosti-ն:
Իրանը, իր հավաստմամբ՝ այդպես էլ արևմտյան գործընկերներից չլսեց նոր առաջարկներ: «Վեցյակի» երկրներն այլ կարծիք ունեն. Թեհրանին արվել են թարմացված առաջարկներ, մասնավորապես՝ Թեհրանի վրայից ՄԱԿ ԱԽ-ի պատժամիջոցների հանման հնարավորությունը Ֆորդու քաղաքի օբյեկտում՝ մինչև 20 տոկոս ուրանի հարստացումը դադարեցնելու դիմաց, սակայն իրանցիները չեն համաձայնել: Արդյունքում կրկնակի բանակցություններին, որոնք կկայանան Ղազախստանում ապրիլի 5-6-ը, կողմերը մոտեցել են զգուշավոր լավատեսությամբ:
Մասնավորապես, Իրանի ԱԳՆ մամլո խոսնակ Ռամին Մեհմանպարաստը հայտարարել է, որ բանակցությունները հավանաբար կանցնեն ողջամիտ մթնոլորտում, ինչը կօգնի երկու կողմերին վերջնական որոշում գտնել:
Երեկ Ալմաթիում իրանական պատվիրակության ղեկավար, Ազգային անվտանգության գերագույն խորհրդի քարտուղար Սայիդ Ջալիլին հայտարարել էր, որ Թեհրանը հույս ունի՝ բանակցությունները Ղազախստանում կսկսվեն «վեցյակի» կողմից ուրանի հարստացման իրենց իրավունքի ճանաչմամբ: Իր կողմից ԵՄ դիվանագիտության ղեկավար Քեթրին Էշթոնը հույս է հայտնել Իրանից ստանալ պատասխան միջազգային միջնորդների «վեցյակի» առաջարկներին:
Ինչպես սպասվում է՝ բանակցությունները կսկսվեն քիչ անց՝ Երևանի ժամանակով 08.30-ին:
