ՀՀ ԱԺ նախագահ Գալուստ Սահակյանը «Առաջին լրատվական»-ի հետ զրույցում անդրադարձավ Սյունիքի մարզպետ Սուրիկ Խաչատրյանի որդու ազատ արձակման փաստին. «Սյունիքի մարզպետին այս դեպքում պետք է ձեր տեսադաշտում ընդունեք ոչ թե որպես մարզպետ, այլ ծնող, մեզանից յուրաքանչյուրը սյուբյեկտիվ վերաբերմունք ունի իր երեխայի նկատմամբ: Խափանման միջոցը չի նշանակում, որ դեռևս գործընթացները չկան: Ինչ- որ մի մաս կա, որը չի սիրում մարզպետին, և վերագրում է, որ ինչ-որ անհասկանալի, արդարադատությունից դուրս երևույթներ են տեղի ունենում, ես այդ կարծիքին չեմ»:
Անդրադառնալով այն մեղադրանքներին, ըստ որոնց՝ իշխանությունն է հովանավորում, պաշտպանում Սյունիքի մարզպետի հանցագործությունները, ԱԺ նախագահը նշեց. «Դա ինչ-որ մի հատվածի մեղադրանք կարող է լինել, այնպես չէ, որ բոլորի տեսակետը նույնն է, և դրա համար էլ արդարադատություն կա, պիտի կարողանա հավաստի ձևով հասարակությանը ներկայացնել»:
Եվ առիթը բաց չթողնելով՝ Գ. Սահակյանը նշեց. «Ի դեպ նոր սահմանադրությամբ բոլորովին կփոխվի արդարադատության ցանկացած սցենար՝ կապված դատարանների կամ համապատասխան լիազոր մարմինների հետ: Դրա համար, որպեսզի դուք էլ մտահոգություններ չունենաք, անհրաժեշտ են համակարգային փոփոխություններ»:
