Սեպտեմբերի 21-ին Աբովյան փողոցում դաժան ծեծի ենթարկված ազատամարտիկ Սմբատ Հակոբյանը վաղը հանդես կգա ասուլիսով և կարևոր հայտարարություններ կանի: Այս մասին «Առաջին լրատվական»-ի հետ զրույցում ասաց Սմբատ Հակոբյանը:
Նա երկու օր առաջ դուրս է գրվել «Սուրբ Գրիգոր Լուսավորիչ» հիվանդանոցից, սակայն երեկ նրա ինքնազգացողությունը կտրուկ վատացել է: Այսօր էլ մի քանի անգամ իրեն վատ է զգացել:
«Վաղվա ասուլիսը շատ կարևոր է, քանի որ լրատվամիջոցներում իրարամերժ լուրեր են դրվում, որոնք 95 տոկոս իրականությանը չեն համապատասխանում: Դրա համար ես որոշեցի վաղը մամուլի ասուլիսով հանդես գալ և վերջին դեպքերի հետ կապված պարզաբանումներ տալ: Ես պատրաստվում եմ ցանկացած ձևաչափի հարցերին անվերապահորեն պատասխանել և լուրջ պարզաբանումներ եմ տալու, որոնք հանրությանը վաղուց հետաքրքրում են»,- ասաց ազատամարտիկը:
Նրա խոսքով՝ խնդիրն այստեղ ոչ թե իր հետ կատարված սպանության փորձն է, այլ մեր հանրապետության ներսում տիրող կոռուպցիոն կլանային վիճակը, անպատժելիության մթնոլորտը:
Քանի որ ազատամարտիկը գլխապտույտ ունի, ասուլիսը կլինի իր տանը. «Տանս պայմանները լիովին բավարարում են ասուլիս անցկացնելուն, տանն է լինելու ժամը՝ 15:00-ին, Ավան 14 փողոց, տուն 15»,- ասաց նա:
Նա պնդեց, որ իր հետ կատարվածը քաղաքական ակցիա է՝ հովանավորների կողմից պատվիրված: «Մենք այդքան միամիտ չպետք է լինենք: Սեպտեմբերի 21-ին՝ Անկախության տոնի օրը, ազատության մարտիկի նկատմամբ մահափորձ է կատարվում, և սա չի կարող տնտեսական հողի վրա լինել: Նորից եմ պնդում իմ նախկին ասածը՝ որևէ մեկը չի կարող բերել որևէ փաստարկ, որ ես կենցաղային հարցերով նման խնդիրներ ունեմ, որ կարող էին նման հաշվեհարդար տեսնել ինձ հետ: Սա զուտ քաղաքական պատվեր է՝ կապված է իմ մեկուկես տարվա քաղաքական գործունեության հետ, և վաղը ավելի մանրամասն կպարզաբանեմ»,- հավելեց ազատամարտիկը:
Ի դեպ, նա նշեց, որ Ռուբեն Հայրապետյանի կողմից արված հայտարարություններին նույնպես կանդրադառնա:
