Ռուսական RIA Novosti լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը Ռուսաստանի նախագահ Վլադիմիր Պուտինի հետ հանդիպման ժամանակ հույս է հայտնել, որ երկու երկրների միջև ապրանքաշրջանառության ծավալը մինչև 2023 թվականը (Թուրքիայի Հանրապետության հիմնադրման 100-ամյակը) կհասնի 100 միլիարդ դոլարի:
«Ինչպես ձեզ հայտնի է, մեր նպատակը 100 միլիարդ դոլարի նշաձողին հասնելն է։ Մենք մեր առջև այդպիսի նպատակ ենք դրել մինչև 2023 թվականը։ Չնայած համաշխարհային տնտեսության բարդություններին՝ երկկողմ ապրանքաշրջանառությունն առանձնանում է դրական միտումներով։
Այսօրվա հանդիպումը լավ առիթ է՝ քննարկելու երկկողմ համագործակցության հարցը, ինչպես նաև միջազգային խնդիրները։ Թուրքիայի ու Ռուսաստանի միջև երկկողմ հարաբերությունները հասել են շատ լավ մակարդակի»,- ասել է Էրդողանը:
Նա նաև շնորհակալություն է հայտնել Պուտինին՝ Մոսկվայի կենտրոնական մզկիթի կառուցման մեջ անձնական ներդրման համար։
Հիշեցնենք, որ 2014 թվականին Թուրքիայի ու Ռուսաստանի միջև ապրանքաշրջանառության ծավալը կազմել է ավելի քան 31 միլիարդ դոլար։ Թուրքիայից Ռուսաստան արտահանման ծավալը կազմել է 5.94 միլիարդ դոլար, իսկ ներկրումը՝ 25.28 միլիարդ դոլար։ Ռուսաստանը Թուրքիայի արտահանման շուկաներում զբաղեցրել է 7-րդ տեղը, իսկ ներկրման՝ 1-ին տեղը։
