Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի ամերիկացի համանախագահ Ջեյմս Ուորլիքը BBC-ի ադրբեջանական ծառայությանը տված հարցազրույցում անդրադարձել է Ղարաբաղյան հակամարտության կարգավորման հիմնախնդրին:
Նա ընդգծել է, որ հայ-ադրբեջանական սահմանին ու ղարաբաղա-ադրբեջանական շփման գծում լարվածությունը շատ բարձր է. «Մենք մտահոգ ենք հրադադարի ռեժիմը խախտելու ու ծանր սպառազինություն՝ ներառյալ նաև հրետանի, կիրառելու դեպքերի մասին տեղեկությունների առնչությամբ։ Արկերի ու ծանր սպառազինության օգտագործումն անթույլատրելի է։
Մեզ հատկապես մտահոգում են խաղաղ բնակչության շրջանում առկա կորուստները և կողմերին կոչ ենք արել ձեռնարկել հնարավոր բոլոր քայլերը՝ նմանատիպ բռնությունները կանխելու համար։ Հանուն իրավիճակի կայունացման՝ մենք շարունակում ենք քննարկումները՝ ստեղծելու համար վստահության ու ավելի կառուցողական մթնոլորտ կողմերի միջև բանակցությունների համար։
Ես հավատում եմ, որ կողմերն աջակցում են հակամարտությունը բանակցությունների միջոցով կարգավորելու համանախագահների ցանկությանը։ Մեն տարածաշրջանում հանդիպում ենք առաջնորդների հետ, որպեսզի քննարկենք բազմակողմ համաձայնագրի մանրամասները։ Հաջորդ շաբաթ ՄԱԿ ԳԱ-ում արտգործնախարարների հետ հանդիպման ժամանակ մենք առաջին հերթին քննարկելու ենք լարվածության թուլացման ու հրադադարի ռեժիմի լրջորեն պահպանման հարցերը։
Հայաստանում ու Ադրբեջանում չի բավականացնում քաղաքական կամքը՝ համաձայնագիր կնքելու համար։ Ես քանիցս հայտարարել եմ, որ նախագահները պետք է հրաժարվեն ռազմաշունչ հռետորաբանությունից ու հասարակությանը պատրաստեն խաղաղության։ Համանախագահները կողմերի հետ համատեղ աշխատում են բազմակողմ համաձայնագրի մանրամասների վրա, սակայն այդ հարցն առաջին հերթին կախված է նախագահների քաղաքական կամքից։
Ժողովրդական դիվանագիտությունը շատ կարևոր է հայ և ադրբեջանցի ժողովուրդների միջև վստահություն ստեղծելու համար։ Ամբողջ աշխարհում խաղաղության գործընթացներում քաղաքական բանակցությունները լրացվում են ներքևից արվող ջանքերով։ Այդ ջանքերը հնարավորություն են տալիս բարելավել պատերազմից տուժած մարդկանց միջև հարաբերությունները։ Չնայած նրան, որ Հայաստանի ու Ադրբեջանի միջև լարվածությունը շատ բարձր է՝ համանախագահները փորձում են աջակցել երկու երկրների բնակիչների հանդիպմանը»։