Տավուշի մարզի ընդհանուր իրավասության դատարանում Զոյա Զաքինյանի նախագահությամբ ավարտվել է Գևորգ Գևորգյանի և Ասատուր Ծատուրյանի գործի դատական քննությունը:
24-ամյա Գևորգն ու 28-ամյա Ասատուրը երևանաբնակ են՝ «բանգլադեշցիներ»: Հանցավոր արարքը, սակայն, նրանք կատարել են Տավուշի մարզում:
Ըստ դատական ակտի՝ 2015 թվականի փետրվարի լույս 7-ի գիշերը «բանգլադեշցի» տղաները իրենց կանանց հետ գտնվել են Դիլիջանում:
Գիշերվա ժամը 2-ից մինչև 4-ն ընկած ժամանակահատվածում Գևորգն ու Ասատուրը գիշերային «զբոսանքի» են ելել Դիլիջանում ու գաղտնի հափշտակել են Դիլիջանի քաղաքապետարանի հաշվեկշռում հաշվառված «Ամֆիթատրոնի» կենտրոնական մասում գտնվող, 600 հազար դրամ արժողությամբ, Ուրալի մարմարից քանդակագործ Լևոն Թոքմաջյանի քանդակած, մշակութային արժեք ներկայացնող «Հայուհի» արձանը:
«Հայուհուն» տեղավորել են «Ռենջ Ռովեր» մեքենայում՝ տեղավորելու ժամանակ արձանը վնասելով 60 հազար դրամի չափով:
Հափշտակված արձանը Գևորգն ու Ասատուրը տեղափոխել են Երևան ու տեղադրել են Գևորգի աներոջ առանձնատան բակում: Աներոջն ասել են, թե արձանը… գնել են…
«Բանգլադեշցի» «մշակութասեր զբոսաշրջիկներին» մեղադրանք է առաջադրվել գողության համար՝ ՀՀ քրեական օրենսգրքի 177 հոդվածի 2-րդ մասի 1-ին և 2-րդ կետերով:
Դատարանում ամբաստանյալներն իրենց մեղավոր են ճանաչել:
Գևորգ Գևորգյանը հայտնել է, որ փետրվարի 6-ին իրենք հավաքվել ու տոնել են Ասատուրի ամուսնության 4-րդ տարին:
Խնջույքից հետո որոշել են գնալ Դիլիջան: Ժամանակին ինքը ծառայել է Դիլիջանում, որտեղ միշտ իր ուշադրությունը գրավել է «Հայուհի» արձանը: Այն վնասված է եղել, ինքը որոշել է նորոգել: Չի մտածել, որ իր արարքը գողություն է:
Դեռ 2013 թվականից է որոշել այդ արձանը վերանորոգել: Ծառայության վերջին ամիսներին ինքն արձանի մոտ ռուս զբոսաշրջիկների է տեսել: Նրանցից մեկը հեգնանքով է արտահայտվել արձանի վնասված տեսքի, հայկական մշակույթի ու շրջակայքի մաքրության վերաբերյալ: Ինքը ցանկացել է արձանը մաքրել, նախկին տեսքին բերել…
Ամբաստանյալը նշել է, որ արդեն հասկանում է՝ իրենց արածը ոչ թե ի նպաստ մշակույթի է եղել, այլ՝ գողություն էր:
Ասատուր Ծատուրյանն էլ նմանատիպ ցուցմունք է տվել, թե գիշերով գնացել են Դիլիջանի կենտրոն՝ «Հայուհի» արձանի մոտ, ու Գևորգն առաջարկել է այն տանել Երևան ու վերանորոգել: Ինքը համաձայնել է: Վերցրել են արձանը, տեղավորել են մեքենայի մեջ ու տարել են Երևան:
Մինչ արձանը մեքենայի մեջ տեղավորելը Գևորգն ու Ասատուրը իրենց կանանց հետ ուրախ «ֆոտոսեսիա» են արել արձանի մոտ…
«Հայուհի» արձանի գողությունը բավական արագ է բացահայտվել: Արձանը հայտնաբերվել, առգրավվել ու վերադարձվել է Դիլիջանի քաղաքապետարանին: Ամբաստանյալների կողմից հատուցվել է 60 հազար դրամի վնասը, որ պատճառվել էր արձանը տեղափոխելիս:
Ընդհանուր իրավասության դատարանը Գևորգ Գևորգյանին և Ասատուր Ծատուրյանին մեղավոր է ճանաչել գողության համար և յուրաքանչյուրին դատապարտել է 600 հազար դրամ տուգանքի:
