Ռուսական RIA Novosti լրատվական գործակալության փոխանցմամբ՝ ԵԱՀԿ-ում ռուսական պատվիրակությունը մտադիր է առաջիկա հինգշաբթի կայանալիք կազմակերպության Մշտական խորհրդի հերթական նիստում բարձրացնել ԺՀՄԻԳ-ի աշխատանքի մեթոդաբանության հարցը։ Այդ մասին հայտարարել է ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը։
Սեպտեմբերի 11-ին ԵԱՀԿ-ն հայտարարել է, որ մոնիթորինգի չի ենթարկելու Ադրբեջանում նոյեմբերի 1-ին պլանավորված խորհրդարանական ընտրությունները։ Լուկաշևիչի խոսքով՝ իշխանություններն առաջարկված դիտորդների քանակը համարել են ավելորդ՝ առաջարկելով սեփական տարբերակ՝ հաշվի առնելով դիտորդական բոլոր կառույցների դիմումները:
«Սակայն ԺՀՄԻԳ-ը որդեգրել է անհաշտ դիրքորոշում և արդյունքում չեղյալ է հայտարարել Ադրբեջանի ընտրությունների մոնիթորինգը։ Դրա համար էլ Մշտական խորհրդի առաջիկա նիստում ըստ ամենայնի լուրջ խոսակցություն կլինի ԵԱՀԿ-ի տվյալ ինստիտուտի կողմից տվյալ ոլորտում կիրառվող աշխատանքի մեթոդաբանության մասին»,- ասել է նա։
