Մեքսիկայի Սան Լուիս Պոթոսի կենտրոնական նահանգում մոլեգնում են հրդեհներ, որոնք ոչնչացրել են շուրջ 4000 հա անտառ: Այս մասին հաղորդում է RIA Novosti-ն՝ վկայակոչելով տեղի իշխանություններին:
Նահանգի դատախազության տվյալներով՝ հրդեհի զոհ է դարձել 55-ամյա մի կին: Բացի այդ՝ 7 մարդ այրվածքներով և թունավորման ախտանշաններով տեղափոխվել են հիվանդանոց:
Ներկայում գրանցվել է հրդեհի 129 օջախ, ընդ որում՝ Մեքսիկայի շրջակա միջավայրի պահպանության նախարարության տվյալներով՝ այդ օջախների միայն 3%-ն ունեն առաջացման բնական պատճառներ: Մնացած դեպքերում խոսքը միտումնավոր կամ ոչ միտումնավոր հրդեհումների մասին է:
Իրավիճակն ավելի է վատթարացնում երաշտը, որից տուժել է Մեքսիկայի ազգային տարածքի շուրջ 40%-ը: Փորձագետները նշում են, որ մոտակա ժամանակներս իրավիճակը կարող է ավելի վատանալ, քանի որ երաշտը տարածվում է երկրի տարածքի 60%-ի վրա:
Մեքսիկայի մայրաքաղաք Մեխիկոյի իշխանությունները շուրջ 5 տոննա մթերք և դեղամիջոցներ են ուղարկել Սան Լուիս Պոթոսի:
