Լիբանանի ռազմական ստորաբաժանումները՝ Ֆրանսիայի ծովային ուժերի մասնակցությամբ համատեղ ռազմական զորավարժություններ կիրականացնեն Ջունիա քաղաքի ծովափին, որն ընկած է Բեյրութից 10 կմ դեպի հյուսիս: Այս մասին հաղորդում է Լիբանանի ազգային տեղեկատվական գործակալությունը:
Զորավարժությունները տեղի կունենան երեքշաբթի օրը՝ մարտի 26-ին, տեղի ժամանակով՝ 7:00-12:00: Լիբանանի զորահրամանատարությունը կփակի Միջերկրական ծովի ափից մինչև Ջունիա ձգվող ճանապարհահատվածը, քանի որ զորավարժությունները ենթադրում են նաև կրակոցներ:
Զորավարժությունները տեղի կունենան Լիբանանի հյուսիսում իրավիճակի սրվելու ֆոնին: Երկրի հյուսիսային մայրաքաղաք Տրիպոլիում արդեն 4 օր չեն դադարում միջկրոնական բախումները՝ հարևան Սիրիայում տեղի ունեցող ճգնաժամի հողի վրա:
Փոխհրաձգությունները տեղի են ունենում քաղաքի Ջեբել Մոհսեն՝ ալավիական թաղամասի և սուննիներով բնակեցված Էլ-Քաբա և Բաբ-էթ-Թաբան թաղամասերի միջև: Սուննիներն աջակցում են սիրիական ընդդիմությանը, իսկ ալավիները՝ Սիրիայում իշխող վարչակարգին: Վերջին 2 օրվա ընթացքում Տրիպոլիում բախումների զոհ են դարձել 7, վիրավորվել՝ տասնյակ մարդիկ:
Հավելենք, որ Տրիպոլիում բախումները վերսկսվել են Լիբանանի վարչապետ Նաջիբ Միկատիի հրաժարականից հետո, ով ծնունդով այս քաղաքից է:
