Հիշեցնենք, որ այսօրվա հանրահավաքի ժամանակ Ր. Հովհաննիսյանը առաջարկություններ ուղարկեց Սերժ Սարգսյանին, որը նախապես կարդաց Ազատության հրապարակում: Նա հայտարարեց, թե իրենք պատրաստ են Ս. Սարգսյանին «կես ճանապարհին հանդիպել, հաղթահարել այս համազգային հիմնախնդիրը, հանգուցալուծում տալ, փոխել մեր երկրի կարգը, մենաշնորհները, ագահությունը, արտագաղթը: Ժողովուրդը դա է ուզում, ես էլ՝ որպես ժողովրդի մասնիկ»: Եվ պատրաստ են Ս. Սարգսյանին հնարավորություն տալ շարունակելու դե ֆակտո նախագահությունը, եթե ՀՀ ընտրակարգում թողնվի բացառապես համամասնականը և ապահովվի արտերկրում ապրող քաղաքացիների քվեարկությունը: Ինչպես նաև ՀՀ գլխավոր դատախազությունը, հարկային և մաքսային պետական ծառայությունը, ԱԱԾ-ն, արտգործնախարարությունը, ԿԳ նախարարությունը, Վերստուգիչ պալատը, արդարադատության խորհուրդը, հակամենաշնորհային հանձնաժողովը ղեկավարեն իր նշանակած մարդիկ:
Այսինքն` նախ Ր. Հովհաննիսյանն ինքը գնաց որոշակի փոխզիջման, նոր` նախագահական ընտրությունների նշանակման կամ իր դիակի վրա երդվելու պայմանները մեղմեց: Եվ հիմա հերթը Ս. Սարգսյանինն է, ու ակնկալվում է, որ նախագահը պետք է պատասխան տա:
Ի՞նչ հնարավոր պատասխան կամ փոխզիջում կարելի է ակնկալել Ս. Սարգսյանից կամ ՀՀԿ-ից: «Եթե խնդիրներ կան, բազմիցս ասել ենք, կարելի է նստել, քննարկել օրով, տեղով, ժամանակով: Եթե նորից ժողովրդին պահելու, պատանդելու, նոր ոգևորություն առաջացնելու հարց է, պարզապես մեզ համար ընդունելի չի լինի»,- ասաց Գ. Սահակյանը:
Այնուամենայնիվ Ր. Հովհաննիսյանը գրավոր առաջարկ ուղարկեց, Ս. Սարգսյանը դրա վրա խա՞չ կքաշի, թե՞ կփորձի քննարկել: «Ես կարծում եմ` ինչ-որ ժամանակներ են անցել, բայց ամեն ինչն էլ քննարկելի է: Գոյություն ունեն պայմանավորվելու պատշաճ ձևեր, հեռագրերո՞վ պիտի խոսենք: Եթե խոսելու խնդիր ունի, նախագահը հրավիրել էր: Իսկ նոր հրավերը նախագահի խնդիրն է, թերևս էլի հրավիրի: Թեև արդեն ամեն ինչը ուշացած եմ համարում»,- եզրափակեց Գ. Սահակյանը:
