Թուրքական Hürriyet թերթի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթթին Դեմիրթաշը դիմել է վարչապետ Ահմեթ Դավութօղլուին՝ կոչ անելով ժամանակավոր կառավարության կեսը ձևավորել կանանցից. «Պարոն Դավութօղլուին արածս կոչը հետևյալն է՝ Թուրքիայում ընտրողների կեսը կանայք են։ Ձեր ձևավորելիք ժամանակավոր կառավարության կեսը պետք է բաղկացած լինի կանանցից»։
Խոսելով իր կուսակցությունից ժամանակավոր կառավարությունում ընդգրկվելու թեկնածուների մասին՝ Դեմիրթաշն ընդգծել է, որ կուսակցության համանախագահներից բացի՝ մնացյալ 78 պատգամավորներից յուրաքանչյուրն էլ կարող է դառնալ նախարար։
Դեմիրթաշը չի ցանկացել տալ պատգամավորների ու նախարարությունների կոնկրետ անուններ։ Փոխարենը Դեմիրթաշը չի բացառել, որ ԺԴԿ-ի բոլոր նախարարները կլինեն կանայք։ Դեմիրթաշը կողմ է արտահայտվել («Քրդական հարցի») կարգավորման շարունակմանը, և որ իրենք անհապաղ խաղաղություն են ցանկանում։
Հիշեցնենք, որ հունիսի 7-ի ընտրությունների արդյունքներով ԺԴԿ-ն ստացել է 80 պատգամավորական մանդատ, որոնցից 32-ը կանայք են։ ԺԴԿ-ի պատգամավորների թվում կանանց մասնաբաժինը կազմել է 40 տոկոս, որով և նա առաջատար է խորհրդարան մուտք գործած մյուս ուժերի թվում։
«Արդարություն և զարգացում» կուսակցության (ԱԶԿ) 258 պատգամավորից իգական սեռի ներկայացուցիչներ են 41-ը (15.89 տոկոս), «Ժողովրդա-հանրապետական» կուսակցության (ԺՀԿ) 131 պատգամավորների թվում կա 21 կին (16.03 տոկոս), իսկ «Ազգայնական շարժում» կուսակցության (ԱՇԿ) 80 պատգամավորներից միայն 4-ն են կանայք (5 տոկոս)։ Միակ անկախ պատգամավորն էլ արական սեռի ներկայացուցիչ է։
