Ադրբեջանական Turan լրատվական գործակալության փոխանցմամբ՝ պետական մեղադրող Ռամազան Խադիևը այսօր ելույթ է ունեցել լրագրողուհի Խադիջա Իսմայլովայի նկատմամբ դատական գործընթացի ժամանակ և պահանջել է նրան դատապարտել 9 տարվա ազատազրկման։
Պետմեղադրողի խոսքով՝ դատական հետաքննությունն «ապացուցել» է Իսմայլովայի մեղավորությունը բոլոր կետերում։ Այս մասին գործակալությանը հայտնել է Իսմայլովայի փաստաբան Ֆարիզ Նամազլըն։
Իսմայլովան մեղադրվում է Ադրբեջանի ՔՕ հետևյալ հոդվածները խախտելու համար. 125-րդ (ինքնասպանությանը հասցնել), 179.3.2 (խոշոր չափի միջոցների յուրացում ու վատնում), 192.2.2 (ապօրինի ձեռնարկատիրություն՝ խոշոր եկամուտներ ստանալու համար), 213.1 (հարկեր վճարելուց խուսափում) և 308.2 (ծառայողական լիազորությունների չարաշահում, որը հանգեցրել է ծանր հետևանքների)։
Իսմայլովան հերքել է բոլոր մեղադրանքները և համարում է, որ դրանք ներկայացվել են քաղաքական դրդապատճառներով։ Amnesty İnternational-ը Խադիջա Իսմայլովային ճանաչել է «խղճի բանտարկյալ»։ Իսմայլովայի փաստաբանների ելույթը նշանակված է օգոստոսի 26-ին։
