ԱՄՆ նախկին պետքարտուղար Հիլարի Քլինթոնի նամակագրության մեջ, որը նա իրականացրել է իր անձնական էլեկտրոնային փոստով, գաղտնի տեղեկատվություն է հայտնաբերվել։ Հետաքննությունների դաշնային բյուրոն պարզել է, որ Քլինթոնի ուղարկած նամակները պարունակել են դասակարգված տեղեկատվություն։ Գաղտնի նամակներից մեկն անմիջականորեն վերաբերում է Հայաստանին և Ադրբեջանին։
Այս տարի ավելի վաղ՝ մինչև ԱՄՆ նախագահության համար իր թեկնածության մասին հայտարարելը, Հիլարի Քլինթոնը պետդեպին փոխանցել է ավելի քան 55 հազար անձնական էլեկտրոնային նամակ։
Հետաքննությունների դաշնային բյուրոյի գործակալները կասկածել են, որ Քլինթոնը անձնական փոստը օգտագործել է գաղտնի նամակագրության համար։
2009-2011 թթ. առնվազն 19 մարդ, ներառյալ Օբամայի օգնականներ և ԱՄՆ բարձրաստիճան դիվանագետներ, հատուկ նամակներ են ուղարկել Հիլարի Քլինթոնի անձնական էլեկտրոնային փոստի հասցեին։
Ինչպես պարզվել է՝ գաղտնի նամակները, ի թիվս այլ միջազգային հարցերի, վերաբերել են նաև հայ-ադրբեջանական սահմանին տեղի ունեցող բախումներին։
Azeri Daily-ն պետդեպի տվյալների էլեկտրոնային բազայից գտել է գաղտնի նամակ, որը 2009 թվականի սեպտեմբերի 11-ին Քլինթոնին է ուղարկել Կովկասի և տարածաշրջաային հակամարտությունների հարցերով գրասենյակի փոխտնօրեն Ջոն Էսպինոզա։
Նամակում ասվում է. «Տեղեկությունները ԼՂ շփման գծում մահացու միջադեպի վերաբերյալ մնում են չհաստատված։ Պոտենցիալ հետևանքները խաղաղ գործընթացի վրա դեռևս պարզ չեն։ Այս պահին տարածաշրջանային առաջնորդները զգուշորեն են արձագանքում, և ազդեցությունն այլ տարածաշրջանային գործընթացների վրա էական չի թվում ։ Հայաստանի ՊՆ-ն հերքել է անսովոր ակտիվությունը շփման գծի երկայնքով, Ադրբեջանի ՊՆ-ն մամուլին հայտնել է, որ շփման գծում միջադեպերը հաճախակի են։ Երևանի դեսպանատունը հայտնում է, որ սովորական է շփման գծում դիպուկահարների մասնակցությամբ միջադեպերի մասին տեղեկությունները հերքելը, սակայն այդ մագնիտուդի միջադեպը դժվար կլինի կոծկելը։ Բաքվի դեսպանատունը նշել է, որ նախագահ Ալիևը Ղազախստանում է, և տեղի իշխանությունները հավանաբար սպասում են նրա վերադարձին՝ որոշելու, թե ինչպես շարունակեն գործել։ Մեր դեսպանատներից ոչ մեկը չի կարողացել հաստատել տեղական մամուլի տեղեկությունները»։
Չնայած այս նամակը դյուրագրգիռ տեղեկատվություն չի պարունակում, սակայն փաստը, որ ամերիկացի դիվանագետը հայ-ադրբեջանական սահմանի իրավիճակի վերաբերյալ հաշվետվություն է հղում Քլինթոնի անձնական էլեկտրոնային փոստին, ԱՄՆ-ում կարող է համարվել դիվանագիտական նամակագրության կանոնների խախտում։
Հատկանշական է, որ հրապարակված նամակները տեղեկատվություն են պարունակում Հայաստանի և Թուրքիայի միջև խաղաղ բանակցությունների առաջընթացի վերաբերյալ՝ ասվում է Azeri Daily-ի հրապարակման վերջում։
