Երասխ գյուղի մոտակայքում տեղի ունեցած վթարի հետևանքով Արարատի և Վեդու բժշկական.կենտրոններում գտնվող 7 վիրավորի առողջական վիճակը կայուն վերահսկելի է.տեղեկացնում է Առողջապահության նախարարությունը:
«Սուրբ Գրիգոր Լուսավորիչ» բժշկական կենտրոն տեղափոխված հիվանդը գտնվում է վերակենդանացման բաժանմունքում. ախտորոշումը` ձախ ձեռքի առաջին մատի տրավմատիկ անդամահատում: Նրա վիճակը գնահատվում է կայուն ծանր: Կատարվում է ախտորոշմանը համարժեք բուժում: Նշենք, որ տուժածը Իրանի Իսլամական Հանրապետության քաղաքացի է:
«Էրեբունի» բժշկական կենտրոնի վերակենդանացման բաժանմունքում գտնվող հիվանդի մոտ ախտորոշվել է պոլիտրավմա, գանգուղեղի վնասվածք, արյունազեղում: Տուժածի վիճակը ծանր է: Կատարվում են անհրաժեշտ բոլոր բժշկական միջոցառումները:
Հիշեցնենք, որ երեկ առավոտյան ողբերգական ավտովթար է տեղի ունեցել Արարատի մարզում: Եղեգնաձոր-Երեւան ավտոճանապարհի 66-րդ կմ-ի հատվածում Իրանի Իսլամական Հանրապետության քաղաքացու վարած «Մակ» մակնիշի ավտոմեքենան բախվել է 4 տարբեր՝ «Նիսսան Տեանա», «Ֆորդ Տրանզիտ», «Դաֆ» եւ «Մերսեդես Բենց 4141» մակնիշի ավտոմեքենաներին:
«Մակ» մակնիշի ավտոմեքենայի երկաթյա ցիստեռնը պոկվել է կցորդից, եւ դրանում առկա վառելանյութը թափվել է, որի հետեւանքով հրդեհ է բռնկվել Վահրամ Արզումանյանի վարած «Ֆորդ Տրանզիտ» մակնիշի, ինչպես նաեւ՝ ճանապարհի կողքին կայանված «Տոյոտա յարիս» եւ Երեւան քաղաքի բնակիչ Է.Արզումանյանի վարած «Մերսեդես Բենց 350» մակնիշի ավտոմեքենաներում։
Վահրամ Արզումանյանը տեղում մահացել է, իսկ 9-ը քաղաքացիներ տեղափոխվել են տարբեր բժշկական կենտրոններ: