«Դեռ պարզ չէ, թե ռուսական կողմի հրապարակած Պերմյակովի դատավճիռը օրինական ուժի մեջ մտնելուց հետո նա որտեղ է կրելու իր պատիժը՝ մինչև սկսվի հայկական կողմի դատավարությունը»,- «Առաջին լրատվական»-ի հետ զրույցում ասաց փաստաբան Լուսինե Սահակյանը, ով երեկ հետևում էր դատական պրոցեսին և հանդիսանում է Ավետիսյանների իրավահաջորդների շահերի պաշտպանը:
Նրա խոսքով՝ պարզ է, որ մինչև դատական ակտի օրինական ուժի մեջ մտնելը՝ նա կպահվի զորամասում, քանի որ դատարանն այդպես որոշեց, իսկ հետագայում, փաստորեն, պարզ չէ, թե ինչ կլինի:
Ինչ վերաբերում է դատավճիռը օրինական ուժի մեջ մտնելուց հետո պատժի կրման վայրին, փաստաբանի խոսքով՝ դատարանը որոշում կայացրել է, թե ինչ ռեժիմում պետք է պահվի նա, վայրի մասին խոսք չկա, և իրավակարգավորում, ըստ էության, չկա:
«Բայց քանի որ արդեն իսկ հայտարարվել է, որ սպանության մասով գործը պետք է քննվի ՀՀ-ի դատական ատյանների կողմից, ուստի Պերմյակովը պետք է կանգնի Հայաստանի դատական ատյանի առաջ՝ անկախ այն հանգամանքից, թե դասալքության մասով դատական ակտն արդեն իսկ հրապարակվա՞ծ է, թե՞ ոչ: Իսկ թե գործընթացը ինչպես կկարողանան կազմակերպել՝ դեռ պարզ չէ»,- ասաց փաստաբանը:
Վերջինիս խոսքով՝ երեկ ակնհայտ էր, որ բոլոր կողմերը որոշակի շտապողականություն էին դրսևորում: «Բայց չեմ կարծում, որ Հայաստանի դատարանը սպանության մասով կարող է նույն շտապողականությամբ քննել գործը: Ես կարծում եմ, որ հնարավոր չէ Ավետիսյանների սպանության գործով մեկ օրվա ընթացքում դատական ակտ կայացնել»,- նկատեց Սահակյանը:
Նշենք, սակայն, որ երեկ դատական նիստի ավարտից հետո Ավետիսյանների իրավահաջորդների մեկ այլ ներկայացուցիչ՝ փաստաբան Երեմ Սարգսյանը կարծիք էր հայտնել, որ ռուսական կողմի դատավճռից հետո Պերմյակովը պատիժը կկրի Հայաստանի՝ թեկուզ ռուսական ռազմաբազայի տարածքում, այնքան ժամանակ, մինչև հայկական կողմը դատավարությունը ավարտի։ Իսկ դատաքննության ավարտից հետո, երբ որ հայկական կողմը որոշի՝ մեղավոր է Պերմյակովը, թե ոչ, և նշանակի պատիժը, դրանից հետո արդեն նոր կորոշվի, թե հետագայում որտեղ պետք է պատիժը կրի նա:
Հիշեցնենք, որ երեկ՝ օգոստոսի 12-ին, ՌԴ 5-րդ կայազորային ռազմական դատարանը Վալերի Պերմյակովին դատապարտեց 10 տարվա ազատազրկման՝ զենքով դասալքության, զենք-զինամթերք հափշտակելու և ապօրինի կրելու մասով:
