ԵԽԽՎ հայաստանյան պատվիրակության անդամ, ԱԺ Եվրոպական ինտեգրացիայի մշտական հանձնաժողովի նախագահ Նաիրա Զոհրաբյանը պաշտոնական նամակով դիմել է ԵԽԽՎ նախագահ Մևլութ Չավուշօղլուին ու հաշիվ պահանջել ԵԽԽՎ նստաշրջանում Թուրքիայի վարչապետ Էրդողանին հայկական պատվիրակության անդամներին հարց տալու հնարավորություն չտալու համար:
Հիշեցնենք, որ Չավուշօղլուն, հղում անելով ԵԽԽՎ կանոնակարգի համապատասխան հոդվածին, ինքն էր սահմանել Թուրքիայի վարչապետին հարց տվողների հերթականությունը:
«Նա պարտավոր է հայկական պատվիրակությանը պարզաբանումներ տալ, թե ինչ նկատառումներից ելնելով է կիրառել կանոնակարգի այդ դրույթն ու հայկական պատվիրակությանը զրկել Թուրքիայի վարչապետին հարց տալու իրավունքից: Ես սպասում եմ նրա պաշտոնական պատասխանին, թե ինչու է հայկական պատվիրակության դեպքում որոշել կիրառել ԵԽԽՎ կանոնակարգի այդ հոդվածը, եթե այն նախկինում երբևէ չի կիրառվել ԵԽԽՎ ոչ մի նախագահի կողմից»,- տեղեկացրեց Նաիրա Զոհրաբյանը: