«Ջոբս» կենսագրական ֆիլմի համաշխարհային պրեմիերան անորոշ ժամանակով հետաձգվել է: Ֆիլմը պատմում է ամերիկյան Apple ընկերության հիմնադիր Սթիվ Ջոբսի կյանքի ու կարիերային թռիչքի մասին: Այս տեղեկությունը այսօր հաստատել է պրոդյուսերական Open Road Films ընկերությունը՝ այդպես էլ չմեկնաբանելով հետաձգման պատճառները:
Ֆիլմը՝ հոլիվուդյան դերասան Էշթոն Քաթչերի մասնակցությամբ, որը մարմնավորել է միլիոնավոր մարդկանց կուռքին, պետք է վարձույթ դուրս գար ապրիլի 19-ին: Hollywood Reporter կայքի տեղեկություններով՝ հետաձգումը պայմանավորված է «ժապավենը ստեղծողների մարքեթինգային պլաններով»:
Հունվարին ֆիլմը ցուցադրվել էր «Սանդենս» փառատոնի (Յուտա նահանգ) փակմանը ու հարուցել քննադատների ոչ միանշանակ ռեակցիան: Apple-ի հիմնադիրներից Սթիվ Վոզնյակը հայտարարել էր, որ իր ու Ջոբսի շատ փոխհարաբերություններ ֆիլմում խաթարված են ներկայացվել: Բացի այդ, ինչպես կարծում է Վոզնյակը, հեղինակները չեն որսացել համակարգչային ընկերության ստեղծման գաղափարը: «Ամեն ինչ հիմքից սխալ է»,- ենթադրում է նա:
Սթիվ Ջոբսը կյանքի ընթացքում վաստակեց մեծագույն մենեջերի փառք: Նա ավելի քան 200 գյուտի հեղինակ է: Apple-ը՝ նրա գլխավորությամբ, վերածվեց աշխարհի ամենաթանկ կորպորացիայի:
2004թ. բժիշկները նրա մոտ հայտնաբերեցին չարորակ ուռուցք, նա մի քանի անգամ վիրահատվեց, բայց կարողացավ աշխատել մինչև 2011թ. օգոստոսը: Երկու ամիս անց՝ հոկտեմբերի 5-ին, 56 տարեկանում, Սթիվ Ջոբսը հեռացավ կյանքից:
