«Ժառանգություն» կուսակցության փոխնախագահ Արմեն Մարտիրոսյանը, ելույթ ունենալով հանրահավաքին, նշեց, որ հացադուլի որոշումն իսկապես շատ բարդ որոշում էր, բայց եկել էր մի պահ, երբ ճանապարհի ընտրության խնդիր կար և Րաֆֆին իր խոստմանը համաձայն՝ պայքարի ուղղությունը վերցրեց իր վրա իր հացադուլով:
«Իրականում սա ոչ թե հացադուլ է, ստադուլ է, կեղծիքադուլ է, այլ մեր պայքարի վերջին հանգրվանը: Բոլորս անհանգստությամբ են ընդունել այդ փաստը, բայց նրա կամքը, կորովը չի պակասելու, այլ ավելի է հզորանալու»,-ասաց Արմեն Մարտիրոսյանը՝ հավելելով, որ Րաֆֆի Հովհաննիսյանի այս քայլին այսօր միացել է բանաստեղծուհի Վիոլետ Գրիգորյանը: Նա նաև նշեց, որ բանաստեղծուհուց առաջ որոշ քաղաքացիներ նման ցանկություն էին հայտնել, բայց մտավորականը ևս մեկ անգամ ապացուցում է, որ մեր պայքարը, մեր հաղթական պայքարը բացառապես խաղաղ բնույթ է կրելու և որևէ մեկն այն չի վերցնելու մեր ձեռքից և մենք հասնելու ենք մեր հաղթական հանգրվանին:
Նա նաև տեղեկացրեց, որ այսօրվանից ստորագրահավաք է սկսվել: Ի դեպ, ստորագրահավաքտ ոչ միայն Երևանում, այլ նաև որոշ մարզերում կիրականացվի:
Ստորագրահավաքի տեքստում գրված է.«Ես՝ ՀՀ քաղաքացիս, ողջունում եմ նորընտիր նախագահ Րաֆֆի Հովհաննիսյանի պայքարը հանուն հայ ժողովրդի հաղթանակի վավերացման և համազգային վերածննդի, ես պատրաստ եմ անմնացորդ զորակցելու Րաֆֆի Հովհաննիսյանին»:
Ի դեպ, Ա1+-ի անձնակազմն իր մտահոգությունն է արտահայտում երկրում ստեղծված ճգնաժամային իրավիճակի առնչությամբ, ողջունում քաղաքական պայքարը հանուն ժողովրդավարության հաղթանակի, հանուն Րաֆֆի Հովհաննիսյանի վեհ գաղափարի. «Ես մեկ ցնցումն անընդունելի է մեր երկրի և անկախության հասած ժողովրդի համար: Իշխանությանը հորդորում ենք զգոնություն ցուցաբերել, միայն այդ դեպքում կարելի է ողջամիտ արդյունքի հասնել»:
Արմեն Մարտիրոսյանը նաև նշեց, որ նամակում շարադրված ողջույնի խոսքին զուգահեռ իշխանություններին ուղղված կոչն իր գործնական տեսքը կստանա: «Մենք ելել ենք խաղաղ պայքարի, մենք որևէ մեկի դեմ պայքար չունենք, մեր պայքարն ապագա սերունդների և մեր իրավունքների համար է: Մենք գնալու ենք մեր ուղով և հասնելու ենք մեր հաղթանակին»,-ասել է նա:
