Թուրքական Anadolu լրատվական գործակալության փոխանցմամբ՝ Թուրքիայի ԱԳՆ-ն հայտարարություն է տարածել, որում իր հիասթափությունն է հայտնել Իրաքի իշխանություններից, որոնք բացասաբար են արձագանքել Իրաքի հյուսիսում «Քրդստանի աշխատավորական» կուսակցության (PKK) դիրքերին Թուրքիայի կողմից հարվածներ հասցնելուն:
«ԴԱԻՇ-ի դեմ պայքար մղող Իրաքին մեր աջակցությունն ակնառու է։ Իրաքի իշխանություններին հայտնի է բարիդրացիական հարաբերությունների մասին մեր կուրսը։ Դրա համար էլ հիասթափություն է առաջացնում իրաքյան իշխանությունների բացասական արձագանքն այն գործողություններին, որոնք մեր կողմից անցկացվում են PKK ահաբեկչական կազմակերպության դեմ միջազգային իրավունքի շրջանակներում»,- ասված է ԱԳՆ հայտարարության մեջ։
Թուրքիայի ԱԳՆ-ն Իրաքին մեղադրել է իր տարածքում Թուրքիայի նկատմամբ սպառնալիքը չվերացնելու համար՝ ընդգծելով, որ Հյուսիսային Իրաքում գտնվում են PKK-ի բազմաթիվ զինյալներ։
Իրաքի խորհրդարանը Թուրքիայի կառավարությունից պահանջել է դադարեցնել իրաքյան տարածքներին ավիահարվածներ հասցնել և զգուշացրել է, որ այդ գործողության շարունակումը կարող է ամենաբացասական հետևանքներ ունենալ Բաղդադի ու Անկարայի համար։
