Ռուսական RIA Novosti լրատվական գործակալությանը տված հարցազրույցի ժամանակ Ռուսաստանում Թուրքիայի դեսպան Ումիթ Յարդըմը հայտարարել է, որ Ռուսաստանի և Թուրքիայի նախագահներ Վլադիմիր Պուտինն ու Ռեջեփ Էրդողանը կարող են հանդիպել նոյեմբերի վերջին՝ Կազանում տեղի ունենալիք Բարձր մակարդակի համագործակցության խորհրդի շրջանակներում:
«Արդեն գրեթե հինգ տարի է, ինչ մեր երկրների առաջնորդների միջև ամեն տարի անցկացվում են տարբեր հանդիպումներ, այդ թվում նաև Բարձր մակարդակի համագործակցության խորհրդի նիստի շրջանակներում։ Նախորդ տարվա դեկտեմբերի 1-ի խորհրդի նիստն անցկացվեց Անկարայում։ Այս տարի այն կանցկացվի Ռուսաստանում՝ Կազանում, երևի թե նոյեմբերի վերջին։ Ստույգ ժամկետը դեռ հայտնի չէ։
Բանակցություններում պլանավորված թեմաներից մեկը լինելու է «Թուրքական հոսք» գազատարի թեման, ինչը բնական է»։ Դեսպանը չի բացառել, որ Պուտինն ու Էրդողանը կարող են հանդիպել նաև ավելի շուտ. «Դա հավանաբար կլինի միջազգային որևէ գագաթնաժողով։ Ցանկանում եմ ընդգծել, որ G20-ի առաջիկա գագաթնաժողովն անցկացվելու է Թուրքիայում՝ Անթալիայում։ Հնարավոր է՝ դա կարող է առիթ դառնալ հանդիպման համար։ Կա նաև Հարավարևելյան Ասիայի երկրների ասոցիացիայի (ACEAN) ֆորումը, և հնարավոր է, որ այնտեղ էլ տեղի ունենա Էրդողանի ու Պուտինի հանդիպումը»։
