Թուրքական Son dakika լրատվական կայքի փոխանցմամբ՝ քրդամետ Ժողովրդադեմոկրատական կուսակցության (ԺԴԿ) ներկայացուցիչ, Դիարբեքիրից ընտրված պատգամավոր Նուրսել Այդողանը հայտարարել է, որ «Քրդստանի աշխատավորական» կուսակցությանը (PKK) վերջին երկու տարում միացել են 10.000 երիտասարդներ։
Այդողանն ընդգծել է, որ իրենք կապված չեն դրա հետ, և որ այդ գործընթացն իրենցից անկախ գործընթաց է, ինչի մասին քաջատեղյակ են նաև պետական կառույցները։ Այդողանը խնդրի լուծումը տեսնում է «Քրդական հարցի» կարգավորման գործընթացը շարունակելու մեջ։ Նա ընդգծել է, որ «Արդարություն և զարգացում» կուսակցության (ԱԶԿ) ներկայացուցիչները պետք է դադարեցնեն ամեն առիթով ԺԴԿ-ի վրա հարձակումները։
Հիշեցնենք, որ 2012 թվականի փետրվարի կեսին այդ ժամանակ Իրաքի նախագահ Ջելալ Թալաբանիի որդին՝ Հյուսիսային Իրաքի քրդական ինքնավարության վաշինգտոնյան ներկայացուցիչ Քուբադ Թալաբանին, խոսելով PKK-ի խնդրի մասին, հայտարարել էր. «Ասում են՝ եթե ոչնչացվեն Ղանդիլում (Հյուսիսային Իրաք) բազավորված 3000 PKK-ականները, ապա հարցը կլուծվի: Սակայն դա այդպես չէ. չէ՞ որ Թուրքիայի տարածքում կա 1 միլիոն PKK-ական: Ռազմական ճանապարհով չի կարելի հասնել հաջողության: Անգամ Սադամ Հուսեյնին չհաջողվեց ռազմական գործողությունների միջոցով ծնկի բերել Ղանդիլում բազավորվածներին»:
