Sputnik-Georgia լրատվական գործակալության փոխանցմամբ՝ ՆԱՏՕ-ի գլխավոր քարտուղար Յենս Սթոլթենբերգն ընթացիկ տարվա օգոստոսին կայցելի Վրաստան և կմասնակցի ՆԱՏՕ-Վրաստան ուսումնական համատեղ կենտրոնի շտաբ-բնակարանի բացման արարողությանը: Այս մասին հայտնել է Վրաստանի ՊՆ-ը:
Գերատեսչության տվյալներով՝ Սթոլթենբերգի վրացական այցը քննարկվել է ՆԱՏՕ-ի գլխավոր քարտուղարի տեղակալ Ալեքսանդր Վերշբոուի և Վրաստանի պաշտպանության նախարար Թինա Խիդաշելիի հանդիպման ժամանակ, որը տեղի է ունեցել Բրյուսելում: Հանդիպման ժամանակ որոշվել է, որ ՆԱՏՕ-ի գլխավոր քարտուղարը Վրաստան կժամանի օգոստոսին:
Հանդիպման ժամանակ կողմերը քննարկել են 2016 թվականին Վարշավայում կայանալիք ՆԱՏՕ-ի գագաթնաժողովում Վրաստանին հեռանկարներ տրամադրելու հարցը՝ կապված ՆԱՏՕ-ի անդամակցության շուրջ գործողությունների ծրագիր (MAP) տալու հետ:
Խիդաշելին հայտարարել է, որ տրամաբանությունը հուշում է, որ Վրաստանը պետք է ստանա այդ ծրագիրը, քանի որ վերջին 7 տարում նա հաջողությամբ կատարել է բարեփոխումներ, ինչպես նաև մասնակցել է ՆԱՏՕ-ի հովանու ներքո անցկացված միջազգային առաքելություններին:
Ավելի վաղ հաղորդվել էր, որ Վրաստանի զինված ուժերի գլխավոր շտաբի պետ, գեներալ Վախթանգ Կապանաձեն հայտարարել է, որ ՆԱՏՕ-Վրաստան համատեղ ուսումնական կենտրոնը «Վազիանի» ռազմակայանի տարածքում (Թբիլիսիի մոտ) կբացվի մինչև 2015 թվականի սեպտեմբեր:
